Fabian Przybylski hefur verið dæmdur í Héraðsdómi Suðurlands fyrir að ráðast á mann en dómurinn var nýlega birtur.

Hann var ákærður fyrir líkamsárás með því að hafa, sunnudaginn 3. mars 2024, við Vestmannabraut 28 í Vestmannaeyjum, veist að manni, sparkað í fætur og ýtt í bak hans þannig að maðurinn féll í jörðina og slegið hann þremur hnefahöggum í höfuðið þar sem hann lá í jörðinni, allt með þeim afleiðingum að hann hlaut kúlu aftan við eyra, sár fyrir ofan hægra auga, skrámur fyrir ofan og neðan hægra auga og nefbrot.

Przybylski játaði brot sitt.

„Samkvæmt framlögðu sakavottorði, dagsettu 15. janúar 2026, var ákærða gert að sæta fangelsi í 60 daga með dómi Héraðsdóms Suðurlands 28. febrúar 2024 vegna ýmissa brota. Var honum jafnframt gert að greiða 100.000 króna fésekt og hann sviptur ökuréttindum í 6 mánuði við sama tilefni, en fangelsisrefsingin var skilorðsbundin til tveggja ára. Hefur ákærði með brotum sínum nú rofið skilorð framangreinds dóms,“ segir meðal annars í dómnum.

Hann var dæmdur í þriggja mánaða fangelsi og dómur hans skilorðsbundinn til tveggja ára. Þá þarf hann að greiða fórnarlambi sínu 800 þúsund krónur í miskabætur auk vaxta og 100 þúsund krónur í málskostnað.