Eurovision mun í fyrsta sinn færa út kvíarnar utan Evrópu þegar asísk útgáfa keppninnar fer fram í Bangkok í nóvember næstkomandi. Þetta kemur fram í tilkynningu frá Sambandi evrópskra sjónvarpsstöðva

Keppnin markar tímamót þar sem hún fellur saman við 70 ára afmæli Eurovision. Mun asíska útgáfa keppninnar byggja á fjölbreytileika, sköpun og menningarlegri sjálfsmynd svæðisins, en jafnframt halda í gildi keppninnar undir slagorðinu „United by Music“.

Alls hafa tíu ríki þegar staðfest þátttöku, þar á meðal Taíland sem gestgjafi, auk Suður-Kóreu, Filippseyja, Víetnam, Malasíu, Kambódíu, Laos, Bangladess, Nepals og Bútan. Búist er við að fleiri þjóðir bætist í hópinn á næstu mánuðum.

Úrslitakeppnin fer fram laugardaginn 14. nóvember og er gert ráð fyrir að áhorfendafjöldi fari yfir 600 milljónir á heimsvísu.

Martin Green, framkvæmdastjóri Eurovision, segir verkefnið mikilvægt skref í þróun keppninnar. Markmiðið sé að skapa vettvang sem endurspegli raddir og metnað Asíu, án þess að glata sérkennum Eurovision.

Á sama tíma stendur evrópska útgáfan frammi fyrir áskorunum. Deilur hafa sprottið upp vegna þátttöku Ísraels í keppninni árið 2026, meðal annars vegna ásakana um áhrif á símakosningu og gagnrýni tengda stríðsátökum á Gaza-svæðinu.

Nokkur lönd, þar á meðal Spánn, Írland, Ísland, Holland og Slóvenía, hafa ákveðið að taka ekki þátt í keppninni árið 2026.

Úrslitakeppni evrópska Eurovision fer fram í Vínarborg þann 16. maí, með þátttöku 35 ríkja, sem er minnsti fjöldi þátttökulanda síðan keppnin var stækkuð árið 2004.