Töluverð ölvun var í miðborg Reykjavíkur í nótt en frá 17:00 í gær til 05:00 í morgun voru 94 mál skráð í kerfi lögreglunnar á höfuðborgarsvæðinu en einn gistir fangageymslu eftir nóttina.

Lögreglan brást við tilkynningu vegna ósætti milli tveggja manna í Breiðholtinu. Endaði rifrildið þannig að annar maðurinn hafði í hótunum við hinn og framdi svo eignarspjöll á faratæki hans. Lögreglan kom á vettvang og tók framburð af mönnunum.

Í miðbæ Reykjavíkur var framið vopnað rán þar sem maður hafði ógnað starfsmanni söluturns með hníf. Komst þrjóturinn undan með eitthvað af fjármunum en starfsmann sakaði ekki. Lögreglan leitar mannsins enn.

Tveir veggjakrotarar voru nappaðir við að krota á vegg í Laugardalnum. Voru þeir handteknir og skýrsla tekin af þeim. Eiga þeir von á kæru vegna eignaspjalla fyrir krotið.

Alls voru 12 ökumenn handteknir víðsvegar á Höfuðborgarsvæðinu, fyrir akstur undir áhrifum áfengis og/eða fíkniefna.

Þá barst lögreglu tilkynning vegna nágrannaerja í Breiðholtinu. Þegar lögregla mætti á vettvang höfðu átt sér stað handalögmál milli nágranna. Var framburður tekinn af aðilunum á vettvangi.

Að lokum greinir dagbók lögreglunnar frá tilkynningu sem barst vegna partýhávaða í Grafarholtinu, um miðja nótt. Tók tilkynnandinn sérstaklega fram hversu falskur söngur veislugesta væri. Svaraði lögreglan kallinu og bað gesti veislunnar að „hemja söngraddirnar og helst að geyma sönginn þar til í sturtunni, á kristilegri tíma, eins og það er orðað í dagbók lögreglunnar.“