Samkvæmt dagbók lögreglunnar á höfuðborgarsvæðinu gista átta manns í fangageymslu hennar eftir nóttina og seinni part gærdagsins. Alls voru 76 mál skráð í kerfi lögreglunnar. Hér má sjá nokkur dæmi um verkefni lögreglunnar.

Lögreglan við Hlemm stöðvaði ökumann við umferðareftirlit en hann reyndist vímaður við akstur og var sviptur ökuréttindum. Var hann handtekinn og færður á lögreglustöð í blóðsýnatöku. Ökumaðurinn var laus að henni lokinni.

Tilkynnt var um aðila með hníf í miðbæ Reykjavíkur. Góð lýsing fylgdi tilkynningunni sem varð til þess að lögreglan hafði upp á kauða. Var hann handtekinn og færður á lögreglustöð en málið er í rannsókn.

Þá barst tilkynning sömu lögreglu um fjölda manns að ógna húsráðanda í heimahúsi með kylfum og hnífum. Reyndu þeir að flýja af vettvangi áður en lögreglu bar að garði en lögreglan hafði upp á þeim. Alls voru fimm handteknir í málinu og allir vistaðir í fangaklefa í þágu rannsóknar málsins en þeir eru grunaðir um hótanir og vopnaburð.

Leigubílstjóri bað um aðstoð þar sem hann var í vandræðum með farþega sem neitaði að borga fyrir farið. Lögreglan mætti á staðinn og er málið í rannsókn.

Lögreglunni sem annast verkefni í Hafnarfirði og Garðabæ, barst tilkynning um meðvitundarleysi á skemmtistað. Er lögregla kom á vettvang reyndist um líkamsárás að ræða. Var gerandinn handtekinn á vettvangi og fluttur í fangaklefa. Sama lögregla kannaði dyravarðaréttindi á skemmtistað. Reyndist dyravörður vera án tilskildra réttinda og er málið í rannsókn.

Lögreglan sem starfar í Kópavogi og í Breiðholtinu fékk tilkynningu um sofandi aðila í bifreið. Athugaði lögreglan með ökumanninn en hann reyndist aðeins vera að hvíla sig, ekkert var aðhafst frekar.

Tveir ökumenn voru stöðvaðir við umferðaeftirlit af lögreglunni á Vínlandsleið, reyndust þeir báðir ölvaðir og voru þeir fluttir á lögreglustöð í blóðsýnatöku. Var þeim sleppt af henni lokinni.