Slökkvilið höfuðborgarsvæðisins fóru í alls 73 sjúkraflutninga síðasta sólarhring en samkvæmt Facebook-færslu slökkviliðsins skiptust þeir jafnt á milli næturvaktar og dagvaktar.

Dælubíll var tvívegis kallaður út, annars vegar vegna vatnstjóns og hitt vegna ruslatunnuelds sem breiddi úr sér í gróður en hann er víða ansi þurr.

C-vakt slökkviliðsins notaði gærdaginn til æfinga í Kópavogshöfn, þar sem útkall í sjó var æft með köfurum og bátum. Kafara slökkviliðsins fundu meðal annars Hopp-hjól í sjónum.

Af lögreglunni á höfuðborgarsvæðinu er lítið að frétta eftir nóttina en þrír gista fangageymslur. Það litla sem sagt var frá í dagbók hennar, sem send er fjölmiðlum á hverjum degi, segir af þó nokkrum ökuþrjótum sem keyrðu víðsvegar um höfuðborgarsvæðið undir áhrifum fíkniefa eða áfengis. Þá var einnig tilkynnt um stórfellda líkamsárás í Grafarvoginum en frekari upplýsingar um málið fylgdi ekki dagbók lögreglunnar.