Lík tveggja belgískra fjallgöngumanna, sem hurfu í svissnesku Ölpunum fyrir 34 árum, hafa fundist í Trift-jöklinum í suðurhluta Sviss. Bráðnun jökulsins varð til þess að lík mannanna komu í ljós eftir áratugi í ísnum.
Lögreglan í Wallis greindi frá því á miðvikudag að göngumaður hefði tilkynnt um tvö lík á jöklinum 26. júlí síðastliðinn. Trift-jökullinn er skammt frá landamærum Sviss og Ítalíu.
Líkin voru flutt á réttarlæknisfræðideild sjúkrahússins í Wallis í Sion þar sem unnið var að því að bera kennsl á mennina. DNA-rannsókn hefur nú staðfest að um sé að ræða tvo belgíska fjallgöngumenn sem hurfu á Weissmies-svæðinu árið 1992.
Mennirnir voru 39 og 41 árs þegar þeirra var saknað. Ekki kemur fram í tilkynningu lögreglu með hvaða hætti þeir létust.
Lögreglan í Wallis heldur skrá yfir einstaklinga sem hafa horfið á svæðinu allt aftur til ársins 1925. Flest þeirra mála tengjast háfjallasvæðum og ám.
Bráðnun jökla af völdum hlýnandi loftslags hefur á undanförnum árum leitt til þess að líkamsleifar fólks, sem horfið hefur í fjöllum áratugum áður, hafa komið í ljós.
Á síðasta ári fundust meðal annars bein svissnesks fjallgöngumanns á jökli við Ober Gabelhorn-fjall í Wallis. Sá hafði horfið árið 1994 og líkamsleifar hans því verið í ísnum í um þrjá áratugi áður en þær fundust.
