Lögregla handtók mann í miðbænum eftir að hann reyndi að hlaupa undan lögreglu þegar til stóð að hafa afskipti af honum. Eftir stutta eftirför á fæti náðist maðurinn og var hann með fíkniefni og peninga í fórum sínum. Hann er nú grunaður um sölu og dreifingu fíkniefna.

Í öðrum málum stöðvaði lögregla ökumann sem grunaður er um akstur undir áhrifum áfengis. Sá var látinn laus að lokinni sýnatöku.

Þá flutti lögregla mann á lögreglustöð þar sem hann gat ekki séð um sig sjálfur vegna ölvunar. Honum var gert að gista í fangaklefa þar til hann var talinn fær um að komast sjálfur á milli staða.

Tveir ökumenn til viðbótar voru stöðvaðir grunaðir um akstur undir áhrifum fíkniefna. Annar þeirra reyndist vera án ökuréttinda en hinn hafði verið sviptur ökuréttindum. Báðir voru látnir lausir að lokinni sýnatöku.

Að lokum var lögregla kölluð til vegna þjófnaðar í tveimur verslunum. Málin voru bæði afgreidd á vettvangi með skýrslutöku.