Gunnar Smári Egilsson, ritstjóri Samstöðvarinnar og formaður framkvæmdastjórnar Sósíalistaflokks Íslands, segir að fyrrverandi starfsmaður stöðvarinnar og flokksins, leggi fæð á hann.
Starfsmaðurinn, Karl Héðinn Kristjánsson, sagði sig úr kosningastjórn flokksins og sakaði Gunnar Smára um andlegt ofbeldi, launaþjófnað og ofríki.
Gunnar Smári Egilsson svaraði fyrirspurn Mannlífs með því að saka Karl Héðin um „loddaraskap“, en sjálfur hafði Gunnar Smári sakað Karl um valdsækni með því að hafa sem forseti ungra sósíalista reynt að hækka aldurstakmark í ungliðahreyfinguna úr 30 árum í 35 ár, til að tryggja sér áframhaldandi valdasetu.
„Karl studdi tillöguna sem ég nefndi á fundinum, að aldurstakmark yrði hækkað svo hann gæti verið áfram „forseti“ Roða. Ég tók þetta sem dæmi um valdsækni, álíka og ef ég reyndi að fá átta ára hámarkssetu formanns Framkvæmdastjórnar breytt,“ segir Gunnar Smári. „Nú segir hann mig hafa logið að hann hafi breytt þessari reglu. En segir um leið að hann hafi breytt reglunni með atkvæði sínu og þátttöku á fundinum. Þetta er í takt við aðrar ásakanir frá Karli. Ef fólk les í orð Karls sést fljótt að fátt gengur í raun upp af því sem hann segir. Hann leggur persónulega fæð á mig, virðist kenna mér um að hans tillögur hafi ekki allar náð fram í flokksstarfinu og hans frami ekki orðið nægur. Flokkurinn hefur tekið sínar ákvarðanir á lýðræðislegan máta eftir miklar umræður þar sem Karl hefur haft öll tækifæri til að koma sínum sjónarmiðum fram og nýtt þau óspart. Nú brýst óánægja hans með að hans hugmyndir hafi ekki fengið brautargengi fram í árásum hans og vina hans á mig en beinast þó fyrst og fremst á Sósíalistaflokkinn, sem Karl lýsir sem einhvers konar óreiðukenndu rugli. Það er skrítin lýsing á flokki sem hefur náð miklum árangri og haft mikil áhrif í samfélaginu. Karl vill með þessu háttalagi að fólk velji sig til sérstakrar forystustarfa, að allar stjórnir flokksins verði sameinaðar í eina sem hann ætlar sér líklega að leiða. Flokksmenn munu auðvitað skoða þessa tillögu hans, en ég trúi því að þeir sjái í gegnum þennan loddaraskap.“
Nánar er fjallað um átökin í Sósíalistaflokki Íslands hér:
Komment