Lögreglan á höfuðborgarsvæðinu lýsir eftir tveimur mönnum. Ekki kemur fram vegna hvers eftirlýsingin er.
Sagt var frá því í gær að miklu hefði verði stolið úr fyrirtæki í miðborginni. Miklum verðmætum var stolið að sögn lögreglu, en hún taldi sig hafa endurheimt hluta þýfisins.
Unnar Már Ástþórsson, aðalvarðstjóri í Lögreglunni á höfuðborgarsvæðinu, sagði í samtali við RÚV í gær að málið þá væri mjög sambærilegt öðru máli tveimur dögum fyrr. Þá hafi verið tilkynnt um skartgripaþjófa í miðbænum.
„Við erum búnir að ná hluta af þýfinu en við erum ekki alveg tilbúnir enn þá að gefa upp hvers konar þýfi þetta er. Það gæti valdið því að fleiri færu þá af stað. Við ætlum að reyna að ná betur utan um málið áður en við upplýsum um hvers konar þýfi þetta er,“ sagði Unnar við RÚV.
RÚV segir frá því í dag að um sé að ræða þjófnað á vörum í Gullbúðinni við Bankastræti fyrir andvirði milljón króna. Lögreglan hefur ekki staðfest að um sama mál sé að ræða, eða hvaða verslun hafi orðið fyrir þjófnaðinum.
Skilaboð lögreglu
„Lögreglan á höfuðborgarsvæðinu óskar eftir að ná tali af mönnunum á meðfylgjandi myndum vegna máls sem er til rannsóknar hjá embættinu og eru þeir vinsamlegast beðnir um að hafa samband við lögregluna í síma 444 1000. Ef einhverjir þekkja til mannanna, eða vita hvar þá er að finna, eru hinir sömu einnig vinsamlegast beðnir um að hringja í lögregluna, en upplýsingum má jafnframt koma á framfæri í tölvupósti á netfangið [email protected]“
Komment