Bandaríski varnarmálaráðherrann Pete Hegseth hefur varað Breta við og sagt að Lundúnir gæti verið innan skotfæris íranskra eldflauga.

Hegseth lét þessi orð falla á ríkisstjórnarfundi í Hvíta húsinu. „Fyrir tveimur dögum skutu þeir tveimur misheppnuðum eldflaugum á skotmark í 4.000 kílómetra fjarlægð. Í mörg ár sögðu þeir heiminum að drægnin væri aðeins 2.000 kílómetrar, enn og aftur kemur í ljós að Íran laug,“ sagði hann við blaðamenn.

„Og við heiminn segi ég: Lundúnir er aðeins í 4.000 kílómetra fjarlægð frá Íran,“ bætti hann við. „Þið segið að Íran sé ekki ógn við heiminn, Trump forseti veit betur.“

Enn ríkir þó óvissa um hvort Íran hafi í raun skotið þessum eldflaugum, eins og Bandaríkin og Ísrael halda fram.

Framkvæmdastjóri NATO, Mark Rutte, sagði að bandalagið gæti „ekki staðfest“ fullyrðingar Ísraela um að eldflaugar sem áttu að hafa beinst að herstöð Bandaríkjanna og Bretlands á Diego Garcia-eyju hafi verið skotnar af Íran.

Fyrstu fregnir af árásinni á herstöðina í Indlandshafi, sem hýsir bæði breska og bandaríska hermenn, komu fram í bandarískum miðlum á laugardag.

Ónafngreindir bandarískir embættismenn sögðu að Íran hefði skotið tveimur meðaldrægum eldflaugum að stöðinni, en önnur þeirra hafi bilað í flugi og hin verið skotin niður af bandarísku herskipi.

Ísraelski herinn hélt því síðar fram að um hefði verið að ræða tveggja þrepa langdræga eldflaug sem gæti náð allt að 4.000 kílómetra drægni. Íranar hafa hins vegar neitað því að hafa ráðist á stöðina.

Breski húsnæðisráðherrann Steve Reed sagði í viðtali við BBC að mat stjórnvalda væri að Íranar hefðu „vissulega reynt að skjóta á Diego Garcia“, en bætti við að engin sérstök greining benti til þess að Íran hygðist ráðast á Bretland sjálft.

Talsmaður utanríkisráðuneytis Írans, Esmaeil Baghaei, vísaði ásökununum á bug og kallaði þær hluta af „rangfærslum“. Hann benti á að jafnvel NATO gæti ekki staðfest uppruna eldflauganna og sagði það sýna að heimurinn væri orðinn þreyttur á slíkum „fölskum árásarsögum“.