Átján ára piltur var skotinn til bana í strætisvagni í Tyresö, úthverfi Stokkhólms, í gær. Árásin náðist á eftirlitsmyndavélar og urðu farþegar vitni að atvikinu.

Samkvæmt heimildum fór vopnaður og grímuklæddur einstaklingur um borð í strætisvagn um klukkan 15 síðdegis. Hann á að hafa þröngvað sér framhjá öðrum farþegum, gengið að 18 ára manninum og beint byssu að honum.

Vitni segja að byssan hafi smellt nokkrum sinnum áður en skotið hljóp loks af.

Fjöldi farþega varð vitni að árásinni og náðist hún á upptökur úr eftirlitsmyndavélum. Þegar lögregla kom á vettvang var árásarmaðurinn hins vegar farinn, eftir að hafa flúið úr strætisvagninum.

Sá slasaði var fluttur á sjúkrahús en lést af sárum sínum daginn eftir. Aðstandendur hans hafa verið upplýstir.

Enginn hefur enn verið handtekinn vegna málsins.

Skotárásin er ein af nokkrum undanfarið í Svíþjóð. Frá því á laugardag hafa fimm manns verið skotnir í landinu, í Örebro, Vårby Gård, Solna, Tyresö og Malmö, og hafa fjórir þeirra látist.