Viktorija Urbonaite og Irmantas Verbickas hafa verið dæmd fyrir fíkniefnabrot en mál þeirra var tekið fyrir í Héraðsdómi Reykjavíkur.

Báðum var gefið að sök fíkniefnalagabrot, með því að hafa, föstudaginn 22. september 2023, í íbúð á þriðju hæð, í félagi við tilgreindan aðila, haft í vörslum sínum í sölu- og dreifingarskyni, 123 kannabisplöntur, 370 grömm af kannabisstönglum og 12.590 grömm af kannabislaufum og hafa, um nokkurt skeið fram til þess dags, ræktað greindar kannabisplöntur, sem lögreglumenn fundu við leit í íbúðinni.

Þau játuðu bæði sök en þau hafa ekki hlotið dóm áður.

Þau voru bæði dæmd í fimm mánaða skilorðsbundið fangelsi en dómurinn er skilorðsbundinn til tveggja ára.

Ein loftsía, fimm LED ljósagrindur, einn gulur fjögurra ljósa lampi, fjórir LED lampar, fjórir tímarofar, þrír straumbreytar og einn Samsung farsími voru einnig gerð upptæk.