Illugi Jökulsson, rithöfundur og fjölmiðlamaður, minnist séra Ragnheiðar Erlu Bjarnadóttur sem lést á dögunum, í færslu á Facebook.

Í færslunni rifjar Illugi upp þátttöku þeirra saman í spurningakeppninni Hvað heldurðu? veturinn 1987–88, þar sem lið Reykjavíkur bar sigur úr býtum. Hann segir Ragnheiði hafa gegnt lykilhlutverki í þeim árangri:

„Það fór ekkert milli mála að það var guðfræðingurinn fjölfróði Ragnheiður Erla Bjarnadóttir sem átti mestan þátt í að við náðum að lokum að landa sigri í keppninni.“

Keppnin, sem Ómar Ragnarsson stýrði og Baldur Hermannsson samdi spurningar fyrir, naut vinsælda á sínum tíma og segir Illugi að mikil stemning hafi ríkt meðal þátttakenda. Meðal liðsfélaga voru einnig Guðjón Friðriksson og Flosi Ólafsson.

Illugi lýsir Ragnheiði sem eftirminnilegri manneskju og segir kynni þeirra hafa verið ánægjuleg, bæði á meðan keppnin stóð yfir og síðar:

„Það var reglulega gaman að kynnast þessari svipmiklu konu þennan vetur og þótt kynnin væru stopul síðan fór alltaf vel á með okkur, þá við hittumst á förnum vegi.“

Að lokum vottar hann aðstandendum hennar samúð og heiðrar minningu hennar:

„Nú sé ég að hún er látin og ég votta ástvinum hennar samúð og henni sjálfri alla mína virðingu, bæði fyrir þessi ágætu kynni og náttúrlega sjálfan sigurinn í Hvað heldurðu?“

Hægt er að horfa á rimmu Akureyrar og Reykjavíkur í keppninni hér.