Kona hefur verið dæmd í fangelsi af Héraðsdómi Reykjavíkur en dómurinn var birtur í dag.

Konan var ákærð fyrir líkamsárás með því að hafa, mánudaginn 19. ágúst 2024, innandyra á Seltjarnarnesi, veist með ofbeldi að fyrrverandi sambýlismanni sínum og sparkað ítrekað í vinstri fót hans, með þeim afleiðingum að hann hlaut yfirborðsáverka á fótlegg.

Konan játaði brot sitt en hún hefur ekki áður gerst sek um refsivert athæfi. Henni til málsbóta er litið til þess að hún lýsti yfir iðrun sinni vegna háttseminnar auk þess sem hún lagði fram vottorð sálfræðings þar sem staðfest er að hún leitaði sér aðstoðar sálfræðings vegna mikillar vanlíðanar í tengslum við sambandsslit og samskipta sem hafa fylgt í kjölfarið.

Hún var dæmd í 30 daga skilorðsbundið fangelsi og er sá dómur skilorðsbundinn til eins árs.