Lögreglan á höfuðborgarsvæðinu hafði afskipti af fjölda mála í gærkvöldi og í nótt, meðal annars vegna umferðarlagabrota, þjófnaðar og ofbeldis.

Í tilkynningu frá lögreglu kemur fram að ökumaður hafi verið kærður fyrir svigakstur, að hafa ekið með of stuttu bili á milli ökutækja og fyrir að vanrækja merkjagjöf. Þá var annar ökumaður kærður fyrir að nota farsíma undir stýri og annar fyrir að aka gegn rauðu ljósi í Árbænum.

Svo var einstaklingur handtekinn grunaður um brot á lögreglusamþykkt auk eignaspjalla og þjófnaðar. Í sama hverfi var ökumaður einnig handtekinn vegna gruns um ölvunarakstur og akstur undir áhrifum fíkniefna.

Tveir ökumenn voru handteknir fyrir ölvunarakstur í Hafnarfirði og í Kópavogi var ökumaður handtekinn grunaður um fíkniefnaakstur.

Þá barst lögreglu tilkynning um líkamsárás og hótanir í austurhluta Reykjavíkur. Málið er í rannsókn.