Tilkynning barst lögreglunni við Hlemm um mann sem reyndi að brjótast inn á veitingastað en þrjóturinn var farinn af vettvangi þegar lögregluna bar að garði. Sami maður var síðar tilkynntur með mögulegt þýfi og handtekinn grunaður um innbrot og þjófnað. Þá reyndist hann einnig vera með hnífa og hamar á sér og var hann vistaður í fangaklefa vegna rannsóknar málsins.

Sama lögregla handtók ökumann vegna gruns um akstur undir áhrifum fíkniefna. Reyndist hann aukreitis með útrunnin ökuréttindi en honum var sleppt að lokinni blóðsýnatöku.

Þá var óskað eftir aðstoð lögreglu við að vísa sofandi aðila út af bókasafni og en hann neitaði að fara. Lögreglunni tókst þó að koma honum út.

Einnig var tilkynnt um þjófnað á hóteli í Reykjavík og fór lögreglan á vettvang til að rannsaka málið.