Það er leitt að sjá fyrrverandi formann framkvæmdastjórnar Sósíalistaflokksins halda áfram að grafa undan nýrri forystu í stað þess að sýna flokknum þann stuðning sem hann á skilið. Aðalfundurinn markaði tímamót. Félagar um allt land komu saman, ræddu málin, kusu nýja forystu og tóku fyrstu skrefin í átt að lýðræðislegra, gagnsærra og virkara flokksstarfi.

Fullyrðingar hans um „yfirtöku“ eru tilraun til að rýra gildi þessa lýðræðislega ferlis. Þátttakan á fundinum var söguleg – bæði hvað varðar fjölda og eldmóð. Ef félagar vilja breyta um stefnu, þá eiga þeir rétt á því. Það er ekki brot gegn trausti eða lýðræði – það er eðlileg framvinda lýðræðislegs flokks.

Við höfum aldrei haldið því fram að allt sé í stakasta lagi. Þvert á móti höfum við gagnrýnt alvarleg vandamál innan flokksins: skort á gagnsæi, óviðunandi vinnubrögð, óeðlilega samþjöppun valds, útilokun og vanvirðingu við gagnrýnar raddir. En í stað þess að festa okkur í fortíðinni þá höfum við hafist handa. Við vinnum nú markvisst að:

Stofnun svæðisfélaga og kjördæmaráða sem færa völdin nær grasrótinni um allt land.

Reglulegum opnum fundum þar sem stjórnir flokksins segja frá framgangi mála og kalla eftir þátttöku.

Uppbyggingu Trúnaðarráðs, svo hægt sé að vinna með erfið innri mál og kvartanir félaga – í stað þess að vanrækja slíkt eins og gert var áður.

Endurskoðun á nýtingu fjármuna og áherslu á að fjármagnið styðji við uppbyggingu flokksstarfsins, en ekki einkarekna miðla eða lokuð félög utan lýðræðislegs eftirlits. Þetta verður ákveðið af flokknum í heild og okkur í stjórnunum hlakkar til samtalsins.

Gunnar Smári talar um flótta úr flokknum. Það er vissulega rétt að sumir félagar hafa ákveðið að yfirgefa flokkinn – sem við virðum. En við sjáum líka ný andlit, nýja orku og einbeittann vilja til þess að byggja upp nýtt skeið í sögu Sósíalistaflokksins.

Við munum ekki svara hatri með hatri. Við ætlum ekki að taka þátt í mannorðsmorðum eða hringavitleysu. Við ætlum að halda áfram að vinna – með grasrótinni, fyrir fólkið, af heilindum.

Við viljum flokk sem stendur með alþýðunni, ekki einstaklingum með óskorað vald.

Til þeirra félaga í Sósíalistaflokknum sem velta fyrir sér hvert stefnir: Við bjóðum ykkur að taka þátt. Að mæta á fundi. Að segja skoðun ykkar. Að hjálpa okkur að byggja upp lýðræðislegan, öflugan og siðferðilega traustan flokk. Það verður félagsfundur í júní þar sem verður fjallað um starf stjórnanna viknanna á undan og formið á starfi komandi árs kynnt. Fylgist með tölvupóstinum! 

Einnig höfum við í ROÐA, í samstarfi við framkvæmdastjórn, ákveðið að bjóða í opið hús næstkomandi sunnudag (8. júní) kl. 17:00, þar sem verður matur og samvera og tækifæri til að hitta nýja meðlimi stjórna. Sérstaklega þau yngstu sem eru einnig virkir meðlimir í ungliðadeildinni.

Við ætlum ekki að sigra með því að útiloka – heldur með því að valdefla. Við ætlum ekki að búa til flokk sem snýst um einn mann eða manneskju – heldur hreyfingu sem er mynduð af og stendur með fjöldanum.

Eins og Fred Hampton orðaði það:

„Við ætlum ekki að nota eld gegn eldi – heldur kæla hann með vatni. Við ætlum ekki að mæta hatri með hatri – heldur með kærleika.”

Við svörum ekki sundrung með sundrungu – heldur með samtali, uppbyggingu og góðu fordæmi.

Við vitum að staðan er alvarleg.

Traust margra félaga hefur beðið hnekki – og það skiljum við vel.

En það er einmitt þess vegna sem við verðum að byggja upp sterkari og lýðræðislegri flokk, saman.

Það er einungis með þátttöku fjöldans sem okkur getur tekist að byggja upp öflugan og siðferðilega traustan Sósíalistaflokk – sem getur staðið vörð um réttindi og hag almennings andspænis niðurrifi og vaxandi siðleysi hægri aflanna og miðjunnar. Leyfum ekki hatrinu að sigra.

Tökum þátt. Tökum afstöðu!

Karl Héðinn Kristjánsson 
Ritari Framkvæmdastjórnar Sósíalistaflokksins