Í dagbók lögreglu frá því í nótt er greint frá því að þrír ökumenn hafi verið handteknir vegna gruns um akstur undir áhrifum áfengis eða fíkniefna. Þeir voru fluttir á lögreglustöð í hefðbundið ferli.

Einn maður var handtekinn fyrir að fara ekki eftir ítrekuðum fyrirmælum lögreglu, hann hafði einnig í hótunum við starfsfólk á hóteli. Hann var í engu ástandi til þess að vera meðal almennings sökum annarlegs ástands. Hann var handtekinn og fluttur á lögreglustöð til vistunar.

Lögregla fékk tilkynningu um mann sem var að stunda eignarspjöll og var viðkomandi handtekinn. Hann var svo vistaður í klefa í þágu rannsóknar. Þá var einn handtekinn vegna gruns um líkamsárás og brot á vopnalögum. Hann var að sögn lögreglu vistaður í fangaklefa.

Eldur i gervigrasi

Tilkynnt var um ökumann sem ók á staur og gekk í burtu frá vettvangi. Lögregla fann ökumann stuttu síðar, hann var handtekinn vegna gruns um akstur undir áhrifum áfengis. Hann var fluttur á lögreglustöð þar sem dregið var úr honum blóð. Hann var síðan vistaður í klefa í þágu rannsóknar.

Tilkynnt var um rafhlaupahjólaslys þar sem ökumaður hjólsins ók á tré en ökumaðurinn hélt á pítsu í annarri hendi og reyndi að stýra hjólinu með hinni. Hann reyndist vera undir áhrifum áfengis. Hann var fluttur á bráðamóttökuna þar var dregið úr honum blóð í þágu rannsóknar.

Kveikt var í gervigrasi á höfuðborgarsvæðinu að sögn lögreglu en búið var að slökkva eldinn þegar lögregla mætti á svæðið. Meintir brennuvargar fundust ekki.