Virkni heldur áfram að minnka í eldgosi við Sundhnúkagíga á Reykjanesskaga en gosórói lækkar jafnt og þétt og nánast engin skjálftavirkni mælist á svæðinu. Mengun hefur þó gert eftirlit erfitt og skyggt á vefmyndavélar yfir hánóttina, en með birtingu hefur aðeins létt til og sést nú eldstrókar standa upp úr gígunum.

Bjarki Friis, náttúruvársérfræðingur hjá Veðurstofu Íslands, segir í samtali við RÚV að talið sé að gosið haldi enn áfram úr tíu gígum, en það verði ekki staðfest fyrr en drónaflugi yfir svæðið lýkur.

Þrátt fyrir að lítil gasmengun mælist á Reykjanesskaga sjálfum og á Vestfjörðum hafa fjölmargar tilkynningar borist um blámóðu, m.a. frá Snæfellsnesi til Tröllaskaga. Mesta brennisteinsdíoxíðmengunin mælist nú á Akureyri, þar sem tveimur nýjum loftgæðamælum var komið upp í gær. Þar er mengunin nú 600 míkrógrömm á rúmmetra, sem telst óhollt fyrir viðkvæma einstaklinga, en hæst mældist hún yfir 6.000 míkrógrömmum á rúmmetra í Njarðvík í gær.

Athyglisvert er þó að sú mengun sem nú mælist á Akureyri er ekki að öllu leyti rakin til eldgossins. Samkvæmt Steinunni Helgadóttur, einnig náttúruvársérfræðingi, er um að ræða svifryksmengun sem gæti komið frá hálendinu – eða jafnvel frá Evrópu. Svifryksmengun veldur einnig óheilnæmum loftgæðum á Ísafirði.

Loftgæðamælar á Reykjanesskaga sýna aftur á móti góð loftgæði. Spá Veðurstofunnar gerir ráð fyrir suðaustlægri átt á næstunni, sem gæti leitt gosmengun til norðvesturs yfir Reykjanesbæ, Voga og vestanvert Snæfellsnes.