Þrír einstaklingar hafa verið ákærðir fyrir morð og að stofna barni í hættu eftir að sjö ára drengur fannst látinn inni í skáp á heimili í Cincinnati í Ohio í Bandaríkjunum.

Lögregla fann William Evans-Ellis látinn á fimmtudag á heimili þar sem móðir hans, Kaitlin Evans, bjó ásamt sambýlisfólki sínu, Nessa Keaney og Kirby Rankin. Lík drengsins hafði verið vafið með límbandi og geymt í skáp.

Yfirvöld í Hamilton-sýslu segja að William hafi látist af völdum höggáverka á höfði og að áverkar hafi verið víða um líkama hans. Rannsakendur telja að drengurinn hafi sætt alvarlegu og langvarandi ofbeldi, meðal annars barsmíðum og bruna. Þá er því haldið fram að hann hafi verið beittur pyntingum með vatni.

Evans, Keaney og Rankin voru handtekin og ákærð fyrir morð og brot gegn barni. Lögmaður Evans segir vörnina telja að annar hinna ákærðu hafi orðið William að bana.

Allar þrjár eru áfram í haldi. Fyrirhugað er að meta sakhæfi Rankin fyrir dómi í september.