Ár er nú liðið síðan stórleikarinn Gene Hackman og eiginkona hans, píanóleikarinn Betsy Arakawa, fundust látin á heimili sínu í Santa Fe í Nýju Mexíkó. Nýjar upplýsingar, meðal annars úr upptökum úr búkmyndavélum lögreglu, varpa ljósi á síðustu daga og klukkustundir Betsy áður en hún lést en frá þessu er greint á breska miðlinum Mirror.

Hjónin fundust látin á heimili sínu 26. febrúar og var ljóst að nokkuð hafði liðið frá því að þau létust. Síðar kom í ljós að Betsy, sem var 65 ára, lést af völdum hantaveiru-lungnaheilkennis, sjaldgæfs en alvarlegs sjúkdóms sem smitast meðal annars með nagdýrum. Gene Hackman, sem var 95 ára, lést um viku síðar af völdum hjartasjúkdóms. Þá er talið að langt genginn Alzheimer-sjúkdómur hafi einnig haft áhrif á heilsu hans.

Talið er að heilabilun Gene hafi verið komin svo langt að hann hafi mögulega ekki gert sér grein fyrir því að eiginkona hans til 34 ára væri látin. Hann dvaldi síðustu daga sína einn á heimilinu sem þau höfðu hannað saman.

Taldi sig vera með Covid

Upptökur úr búkmyndavélum lögreglu og gögn sem fundust á heimilinu sýna að Betsy hafði talið sig glíma við einkenni COVID-19. Á fartölvu hennar fundust opnar Google-leitir um einkenni kórónuveirunnar, sem bentu til vaxandi áhyggjur hennar af heilsufari sínu. Þar á meðal voru leitir um svima og blóðnasir, auk bókamerkja frá 8. og 12. febrúar, daginn sem hún er talin hafa látist. Síðar kom í ljós að þessi einkenni samræmdust betur sýkingu af völdum hantaveiru.

Alvarlegur höfuðverkur er eitt algengasta einkenni sjúkdómsins og kemur fram hjá um helmingi sjúklinga, en blóðnasir eru mun sjaldgæfari.

Einn af síðustu tölvupóstum Betsy var sendur 11. febrúar til nuddara hennar, þar sem hún óskaði eftir að færa nuddtíma vegna þrálátra einkenna. Í póstinum greindi hún frá því að hún hefði fengið neikvætt COVID-próf, en vildi engu að síður sýna varúð. Hún nefndi jafnframt að Gene hefði vaknað með flensu- eða kveflík einkenni, en hann hefði einnig greinst neikvæður.

Sama dag keypti Betsy súrefnishylki í gegnum netverslunina Amazon. Talið er að kaupin hafi verið ætluð til að létta undir með öndun og benda þau til þess að annað hvort hún eða eiginmaður hennar hafi átt í öndunarerfiðleikum á þessum tíma.