Gögn sem komu fram í Epstein-skjölunum gefa til kynna að Dorrit Moussaieff hafi verið félagslega staðsett nær innsta kjarna umhverfis Jeffrey Epstein en áður hafði verið gert ráð fyrir. Dorrit hefur um árabil verið virkur þátttakandi í félagslífi breskrar yfirstéttar og liggur fyrir að hún var meðal gesta í 51 árs afmæli Ghislaine Maxwell, samverkakonu Epsteins, sem nú afplánar fangelsisdóm. Meðal annarra gesta þar var einnig Andrés prins, sem síðar var ýtt út úr bresku konungsfjölskyldunni.

Í umfjöllun Mannlífs er leitast við að varpa ljósi á raunveruleg tengsl Dorritar við Jeffrey Epstein og Ghislaine Maxwell, meðal annars í gegnum tvo tölvupósta sem vísa til Dorritar. Í öðrum þeirra greinir rithöfundurinn og nýaldarspekingurinn Deepak Chopra Epstein frá því að Dorrit og „íslenski eiginmaður hennar“ séu stödd á The St. Regis Aspen Resort, lúxushóteli í Aspen í Colorado, þar sem Chopra stýrði hugleiðslu. Þetta átti sér stað árið 2016, skömmu eftir að Ólafur Ragnar Grímsson lét af embætti forseta Íslands.

Hinn tölvupósturinn var sendur á milli einstaklinga sem taldir eru til innsta hrings Epsteins og varðar Dorrit á tíma hennar sem forsetafrú árið 2011. Sendandi póstsins var Ghislaine Maxwell og viðtakandinn Leon, sem talið er að sé auðkýfingurinn Leon Black. Hann greiddi Epstein samtals 158 milljónir Bandaríkjadala á árunum 2012 til 2017 og var helsta tekjulind hans á þeim tíma.

Í póstinum skrifar Maxwell:

„Hæ Leon. Ghislaine hér. Ég sat með Dorrit sem sagði mér að ég ætti að senda þér tölvupóst strax!“

Síðar framsendi hún skilaboðin til Epsteins honum til upplýsinga. Tilefni póstsins var að bjóða þjónustu Maxwell við að velja fólk í stjórnir fyrirtækja. Árið eftir hóf Epstein að fá mjög háar greiðslur frá Black, allt að 40 milljónir dala á ári, fyrir ráðgjafarþjónustu. Í kjölfarið jókst spenna í samskiptum þeirra. Samkvæmt greiningu The New York Times lagði Black síðar hundruð þúsunda dala, jafnvel tugmilljónir króna, inn á bankareikninga að minnsta kosti þriggja kvenna sem tengdust Epstein. Black sjálfur hafði verið sakaður um nauðgun af minnst tveimur konum í húsi Epsteins á Manhattan í New York.

Í viðtali við Mannlíf er Dorrit spurð beint hvort hún þekki Leon Black og hafi hitt hann:

„Já, ég þekki Black-fjölskylduna. Ég hef þekkt þau í marga áratugi. Þau eru vinir mínir.“

Þegar hún er spurð hvort hún útiloki að hafa setið með Ghislaine Maxwell og rætt um Leon Black, líkt og tölvupósturinn gefur til kynna, svarar hún:

„Ég get ekki útilokað það 100%, en ég sé nákvæmlega enga ástæðu fyrir því að ég hefði átt að nefna hann, sérstaklega í þessu samhengi. Herra Black er mikill listasafnari. Ég gæti hafa minnst á list hans, en örugglega ekki viðskipti hans. Og ég skil satt best að segja ekki hvers vegna ég hefði nefnt þetta við Ghislaine. Fyrirtæki hans er skráð á markað. Síðasta manneskjan sem þyrfti að gefa þeim ráð er Ghislaine eða ég.“