Í júlí munu verðtryggð lán hækka um 0,84%, að frádregnum afborgunum. Þetta kom á daginn í morgun þegar Hagstofan birti nýjar tölur um óvænta hækkun vísitölu neysluverðs.

Sérfræðingar í greiningadeildum bankanna höfðu gert ráð fyrir að verðbólgan hefði „aukist lítillega í júní,“ eins og Landsbankinn áætlaði. Bankinn spáði 0,56% hækkun vísitölunnar en hækkunin reyndist vera 0,84%.

Helstu áhrifin eru af hækkun flugfargjalda, sem fóru upp um 12,7%. Það munar líka mikið um hækkun á matarverði, sem hefur risið um 6% á einu ári.

Hækkun vísitölu neysluverðs nú þýðir að verðbólgan, sem er 12 mánaða hækkun vísitölunnar, eykst úr 3,8% í 4,2%. Hún er orðin jafnmikil og hún var í febrúar. Hæst fór hún í 10,2% í febrúar 2023 eftir covid-faraldurinn.

Frá árinu 2021 hafa afborganir á húsnæðislánum hækkað langt umfram laun á Íslandi, eins og kemur fram á grafi frá greiningadeild Landsbankans.