Ungmenni á aldrinum 18-24 ára velja í auknum mæli að sleppa bílbeltum en þetta kemur fram í tilkynningu frá Samgöngustofu.

Fjórtán sinnum meiri hætta er á að verða fórnarlamb banaslyss sé bílbelti ekki notað samkvæmt tilkynningunni.

„Mikilvægt að ná til þessa hóps með öllum leiðum og stuðla að viðhorfsbreytingu,” segir Gunnar Geir Gunnarsson.

Samgöngustofa, í samstarfi við Aur, hefur ýtt úr vör herferðinni Ekki gera þig að fífli og er meginmarkmið hennar að fá ungt fólk til að endurskoða viðhorf sín til notkunar bílbelta. Herferðin er viðbragð við niðurstöðum viðhorfskannana sem Samgöngustofa hefur látið gera árlega og eru niðurstöður síðustu ára bæði skýrar og sláandi.  

Skv. niðurstöðum viðhorfskönnunarinnar eiga 10-15% ungra karla á bilinu 18-24 ára það til að sleppa beltinu.

„Við sjáum slæma þróun síðustu ár, þ.e. að fleiri karlar á aldrinum 18-24 ára velja að spenna ekki beltin af einhverjum ástæðum. Það kemur okkur ekki síður á óvart að konur á þessum aldri eru að feta í fótspor karlanna og eru sömuleiðis farnar að draga úr notkun bílbelta. Þetta er bæði ógnvænleg og illskiljanleg þróun. Því er gífurlega mikilvægt að ná til þessa hóps og stuðla að viðhorfsbreytingu,” segir Gunnar Geir Gunnarsson, deildarstjóri öryggis-og fræðsludeildar Samgöngustofu.

„Mikilvægt að ná til þessa hóps með öllum leiðum og stuðla að viðhorfsbreytingu.”

Samgöngustofa hefur því fengið til liðs við sig nokkra áhrifavalda fyrir herferðina og er hægt að nefna Berglind Festival, Egil Ploder, Daniil og Patrek Jaime.