Samtök fyrirtækja í sjávarútvegi hafa undanfarið birt auglýsingamyndbönd úr sjávarbyggðum. Í myndböndunum sýnir bæjarbúi inn í ýmis fyrirtæki og kemst að sömu niðurstöðu: „Við lifum öll á sjávarútvegi.“ Tilefni auglýsingaherferðarinnar er áform ríkisstjórnarinnar um að tvöfalda greidd veiðigjöld útgerða, með því að byggja stofn þeirra á raunverulegu aflaverðmæti frekar en því sem útgerðin reiknar sjálf í eigin viðskiptum.

Leikarinn og grínistinn Pálmi Gestsson, sem er sömuleiðis Bolvíkingur og hefur þar aðsetur í húsinu Hjara, hefur nú framleitt sitt eigið auglýsingamyndband.

„Þetta er fallegi heimabærinn minn, Bolgunarvík,“ segir Pálmi í myndbandinu. „Þarna er sundlaugin, þarna er gamli skólinn minn, þarna er félagsheimilið mitt, húsið mitt, og Ísafjarðardjúpið mitt. En út af því eru einhver gjöfulustu fiskimið allra tíma. Og þar syndir fiskurinn þeirra,“ bætir Pálmi við og hnykkir út með: „Við lifðum öll af sjávarútvegi.“

Samtök fyrirtækja í sjávarútvegi hafa tekið fyrir fleiri byggðir, meðal annars Akureyri, Neskaupstað og Grundarfjörð, í tilraun til að koma í veg fyrir að þeir þurfi að greiða 10 milljörðum meira af hagnaði sínum í veiðigjöld til ríkissjóðs.

Fjölmargir hafa á Facebook deilt sömu reynslusögunni af byggðum þaðan sem kvótinn hefur verið seldur. Textanum er deilt undir titlinum: Hin hliðin.

„Mig langar til að sýna þér þorpið okkar,“ segir í textanum.

„Þarna var bakaríið okkar. Þarna var vélsmiðjan okkar. Þarna var trésmíðaverkstæðið okkar. Þarna voru verzlanirnar okkar. Þarna var fiskvinnslan okkar. Þarna var frystihúsið okkar. Þarna voru bátarnir okkar.

En ekki núna. Grundvöllur lífsins var sjávarútvegur, veiðar og vinnsla. En ekki núna. Maðurinn sem átti kvótann er farinn. Fjörðurinn er fullur af fiski, en við megum ekki veiða, við eigum ekki fiskinn. Í firðinum OKKAR.“