Leikkonan Jane Fonda lét létt grín falla eftir að Barbra Streisand heiðraði Robert Redford á Óskarsverðlaunahátíðinni í nótt.

„Mig langar að vita hvernig stendur á því að Streisand var þarna uppi að gera þetta fyrir Redford,“ sagði hin 88 ára Fonda í samtali við Entertainment Tonight á rauða dreglinum á Vanity Fair Óskarspartíinu 15. mars. „Hún gerði bara eina mynd með honum en ég gerði fjórar. Ég hef meira að segja.“

Fonda lék á móti Redford í fjórum kvikmyndum: The Chase, Barefoot in the Park, The Electric Horseman og Our Souls at Night. Hún rifjaði upp margar minningar um vin sinn, sem lést í september á síðasta ári, 89 ára að aldri.

„Ég var alltaf ástfangin af honum,“ sagði Fonda

„Fallegasti maður sem til var og með svo góð gildi. Hann gerði líka ótrúlega mikið fyrir kvikmyndir. Hann breytti kvikmyndagerð og styrkti sjálfstæðar kvikmyndir.“

Þegar fregnir bárust af andláti Redford í september sagði Fonda að þær hefðu haft djúp áhrif á hana.

„Það sló mig mjög þegar ég las í morgun að Bob væri farinn,“ sagði hún í yfirlýsingu til E! News. „Ég get ekki hætt að gráta. Hann skipti mig miklu máli og var yndisleg manneskja á allan hátt.“

Hún bætti við að Redford, sem var lengi virkur í stjórnmálum og umhverfismálum, hefði staðið fyrir ákveðin gildi.

„Hann stóð fyrir Ameríku sem við verðum áfram að berjast fyrir,“ sagði hún.

Barbra Streisand rifjaði einnig upp samband sitt við Redford þegar hún heiðraði hann í minningarkafla Óskarsverðlaunanna.

„Ég sakna hans meira en nokkru sinni fyrr, jafnvel þess hvernig hann elskaði að stríða mér,“ sagði hún. „Hann kallaði mig „Babs“. Og ég sagði: „Bob, finnst þér ég líta út eins og Babs?“ En hvernig hann sagði það fékk mig alltaf til að hlæja.“

Streisand sagði að þau hefðu síðar rætt saman í síma um ýmis málefni, þar á meðal stjórnmál og list.

„Þegar við vorum að kveðja sagði hann: „Babs, ég elska þig innilega og mun alltaf gera það“.“

Hún lýsti Redford einnig sem hugrökkum og hugsandi manni.

„Hann var bæði hugulsamur og djarfur,“ sagði hún. „Ég kallaði hann vitsmunalegan kúreka sem ruddi sína eigin braut.“

Í lok minningarkaflans heiðraði Streisand samstarf þeirra á hvíta tjaldinu með því að syngja tilfinningaþrungna útgáfu af laginu „The Way We Were“, sem hlaut Óskarsverðlaun á sínum tíma. Í minningarkaflanum voru einnig heiðruð meðal annars þau Rob og Michele Reiner, Catherine O’Hara og Diane Keaton.