Leikskólastarfsmaður í Bretlandi hefur verið dæmdur í að minnsta kosti 24 ára fangelsi eftir að hafa verið fundinn sekur um alvarleg kynferðisbrot gegn mjög ungum börnum í leikskóla þar sem hann starfaði.
Nathan Bennett, þrítugur karlmaður, var dæmdur við dómstól í Bristol á suðvesturhluta Englands fyrir að hafa ítrekað misnotað fimm drengi sem voru tveggja til þriggja ára gamlir. Dómarinn William Hart lýsti Bennett sem „hættulegum barnaníðingi“ þegar dómurinn var kveðinn upp.
Í rökstuðningi dómsins sagði Hart að Bennett hefði sett eigin kynferðislega ánægju ofar velferð barnanna. „Þetta stafaði af alvarlega brenglaðri hugsun og, svo notað sé gamaldags orð, ákveðinni illsku,“ sagði dómarinn.
Bennett var í síðasta mánuði sakfelldur fyrir átta ákæruliði sem tengjast nauðgun, kynferðisofbeldi og öðrum alvarlegum brotum gegn fimm börnum. Hann hafði áður játað 13 aðra ákæruliði sem vörðuðu fjögur sömu börnin, sem þá voru aðeins tveggja ára gömul.
Saksóknari málsins, Gemma Kneebone, sagði Bennett hafa „misnotað stöðu sína“ sem starfsmaður leikskólans til að fremja ítrekuð brot gegn ungum börnum í hans umsjá.
Málið kemur upp skömmu eftir að annar leikskólastarfsmaður í Bretlandi var dæmdur í 18 ára fangelsi fyrir sambærileg kynferðisbrot gegn börnum á leikskóla í London. Í kjölfar þess máls hefur breska ríkisstjórnin, undir forystu forsætisráðherrans Keir Starmer, íhugað að skylda leikskóla landsins til að setja upp öryggismyndavélar. Nú stendur yfir samráð um slíkar öryggisráðstafanir.
Bennett hóf störf við Partou King Street leikskólann í Bristol árið 2024. Áhyggjur af hegðun hans komu fyrst fram í febrúar 2025 þegar eftirlitsmyndavélar sýndu hann beita barn kynferðislegu ofbeldi.
Fjölskyldur barnanna sem urðu fyrir brotunum segja að misnotkunin hafi haldið áfram þrátt fyrir að áhyggjur hefðu verið tilkynntar starfsfólki leikskólans. Í yfirlýsingu frá lögmannsstofunni Leigh Day segja fjölskyldurnar að viðvaranir og kvartanir hafi ekki verið nægilega rannsakaðar eða komið áfram til viðeigandi aðila.
Lögmaður fjölskyldnanna, Andrew Lord, segir þær nú krefjast skýringa, ábyrgðar og trygginga um að öryggi barna í slíkum stofnunum hafi verið bætt verulega.
