Jón Ólafsson, prófessor í menningarfræði og Sovétsögu, segir að borinn hafi verið út skipulegur rógur um Magnús Karl Magnússon, rektorsframbjóðanda sem laut naumlega í lægra haldi fyrir Silju Báru Ómarsdóttur.

„Það hefur valdið mér undrun og sett mig út af laginu að sjá hvernig sumir kollegar mínir, þar á meðal fólk sem ég hef hingað til haft nokkurt álit á, reyndu síðustu vikurnar og sér í lagi dagana fyrir kjörið að koma óorði á Magnús, dreifandi rógi, rangfærslum og hreinu níði um hann og um leið okkar góða hóp,“ segir Jón.

Hann skorar á Silju Báru að „stíga fram“ enda geti „hún ein hindrað ómaklegar aðdróttanir“.

„Ég vona einlæglega að þessar kosningar sem að langmestu leyti voru góð lýðræðisleg upplifun leiði ekki til klofnings innan háskólans vegna þess að einhver hópur fólks getur ekki hamið sig. Það væri svartur blettur á lýðræðinu innan skólans okkar, þjónar ekki hagsmunum hans og síst verðandi rektors.“

Jón er stuðningsmaður Magnúsar Karls og segir baráttu hans hóps hafa farið prúðmannlega fram. „Fyrir mig hefur verið magnað að taka þátt í þessu. Tugir nemenda og starfsmanna lögðu mikið á sig í kosningabaráttunni sem einkenndist af gleði og einlægum áhuga á velferð Háskólans. Barátta okkar var prúðmannleg – það var mjög skýrt prinsipp að gera hvorki lítið úr mótframbjóðendum né reyna að grafa undan þeim – þannig var það í báðum umferðum. Þrátt fyrir tap er þessi samhenti hópur ánægður með að sína frammistöðu, sinn mann og þau málefni sem hann setti á oddinn.“

Magnús Karl vann fleiri atkvæði nemenda, en Silja Bára fór með sigur af hólmi með fleiri atkvæðum kennara. Atkvæði starfsfólks vógu 70% í kjörinu og atkvæði nemenda 30%.

Þar sem Silja Bára hlaut 50,7 prósent atkvæða hlaut hún tilnefningu í embætti rektors og verður sett í embættið 1. júlí næstkomandi.