Bensínskortur er aftur farinn að gera vart við sig í Moskvu eftir nýlegar árásir Úkraínumanna á rússnesk olíuhreinsunarstöðvar. Bílstjórar hafa síðustu daga myndað raðir við bensínstöðvar í rússnesku höfuðborginni og sums staðar hafa ákveðnar tegundir eldsneytis selst upp.
Úkraínski herinn gerði í síðustu viku árás á stóra olíuhreinsunarstöð í Jaroslavl, norður af Moskvu. Ástandið hafði batnað undir lok júlí eftir mikinn eldsneytisskort fyrr í sumar en nú virðast vandamálin vera að koma upp á ný.
Fréttamaður AFP sá tugi bifreiða bíða eftir eldsneyti á nokkrum bensínstöðvum í Moskvu í dag. Ekki er þó um alvarlegan eða almennan skort að ræða enn sem komið er.
Eldsneytisskortur varð útbreiddur í Rússlandi fyrr í sumar eftir árásir úkraínskra dróna á olíuhreinsunarstöðvar. Um tíma höfðu um 90 prósent rússneskra héraða sett einhvers konar takmarkanir á eldsneytiskaup, meðal annars með því að takmarka magn sem hver viðskiptavinur mátti kaupa.
Íbúar Moskvu sem AFP ræddi við sögðust hafa tekið eftir bæði lengri biðröðum og hækkandi eldsneytisverði. Leigubílstjórinn Nursultan Akhmadov sagði aukinn eldsneytiskostnað bætast við hækkandi verð á matvælum og öðrum nauðsynjum.
Úkraínsk stjórnvöld hafa lýst árásum á rússneska olíuinnviði sem lið í því að veikja getu Rússlands til að fjármagna og halda áfram stríðsrekstrinum.
