Heiðar Örn Sigurfinnsson fréttastjóri RÚV telur ekki vera tilefni til þess að leiðrétta fréttaflutning Ríkisútvarpsins á fréttum um Ásthildi Lóu Þórsdóttur, fyrrverandi barnamálaráðherra.

Ríkisútvarpið hefur verið harðlega gagnrýnt undanfarið vegna frétta af kynferðissambandi Ásthildar Lóu Þórsdóttur við tæplega 16 ára dreng, fyrri 35 árum, þegar hún var 22 ára, en hún varð ólétt og eignaðist son. Þótti fyrsta frétt RÚV af málinu ónákvæm en þar var vitnað í lög um að „einstaklingar yngri en átján ára teljast börn, í skilningi laganna“. Þessi lög eiga ekki við tilfellið þar sem sjálfræðisaldur var hækkaður úr 16 árum í 18 árið 1997. Þá var ýjað að því í fréttinni að Ásthildur Lóa hafi gerst sek um lögbrot þar sem hún hafi verið leiðbeinandi drengsins þegar samband þeirra hófst en ekki hefur verið sannað að hún hafi verið leiðbeinandi hans. Aukreitis hélt konan sem tilkynnti málið því fram að forsætisráðuneytið hefði brotið trúnað sinn með því að gefa Ásthildi Lóu nafn sitt en þessu neitar ráðuneytið.

Aðspurður segir fréttastjóri RÚV, Heiðar Örn Sigurfinnsson að hann telji ekki að Ríkisútvarpið þurfi að leiðrétta fréttina.

Mannlíf sendi eftirfarandi spurningar á Heiðar Örn:
Stendur til að leiðrétta eitthvað í umfjöllun RÚV um Ásthildi Lóu Þórsdóttur? Telur fréttastofa að eitthvað hafi misfarist í fréttum ykkar um ráðherrann?

Heiðar Örn svaraði:

„Varðandi þátt Ásthildar Lóu þá hefur ekki verið talið tilefni til að leiðrétta fréttina né hefur komið fram krafa um slíkt frá henni og öðrum sem í hlut eiga. Fréttaumfjöllunin byggði á heimildum, munnlegum sem skriflegum, ásamt því að leitast var eftir að fá fram afstöðu ráðherrans til málefnisins, og gerð grein fyrir hennar afstöðu eftir að hún lá fyrir.“

Þá segir Heiðar Örn að RÚV hafi metið sem svo að umfjöllunin hafi átt fullt erindi við almenning.

„Það er jafnframt mat RÚV að umfjöllunin og upplýsingarnar sem þar komu fram hafi átt fullt erindi við almenning, en í því samhengi má jafnframt benda á að áður en að fréttin fór í loftið, og áður en raunar að starfsmenn Ríkisútvarpsins náðu að bera efnistökin undir ráðherrann, hafði hann tilkynnt um afsögn sína.“

Hvað varðar meintan trúnaðarbrest forsætisráðuneytisins segir Heiðar Örn að sú umfjöllun hafi byggt á orðum konunnar sem tilkynnti málið en að hlið ráðuneytisins hefði komið fram í fréttum RÚV.

„Varðandi meintan trúnaðarbrest forsætisráðuneytisins gagnvart þeim sem komu upplýsingunum á framfæri þá var sú umfjöllun reist á því að hlutaðeigandi kvaðst hafa verið heitinn trúnaður. Fyrir liggur að upplifun forsætisráðuneytisins er önnur samkvæmt því sem hefur komið fram og hefur verið gerð grein fyrir þeirri afstöðu í fréttum RÚV.“