Stefán Pálsson er afar ósáttur við framsetningu meirihluta bæjarstjórnar Kópavogs sem hefur tilkynnt að laun bæjarfulltrúa muni lækka og opnunartími sundlauga styttast vegna launakrafa kennara.

Sagnfræðingurinn og varaborgarfulltrúinn Stefán Pálsson skrifaði Facebook-færslu rétt í þessu þar sem hann furðar sig á framsetningu forystufólks Kópavogsbæjar, á fyrirhuguðum hagræðingum sveitarfélagsins en hann hlekkjar frétt um fyrirhugaðar sparnaðaraðgerðir Kópavogsbæjar.

„Mikið er þetta furðuleg framsetning hjá forystufólki í sveitarfélagi - sem er með ótal útgjaldapósta. Hvað næst? Fréttatilkynning frá Kópavogsbæ um að það verði minna þrifið hjá eldri borgurum af því að frekjuhundarnir í Kórahverfinu vildu endilega láta ryðja burtu snjónum í vetur? Eða að það verði engum sumarblómum plantað því að fótboltaliðin í bænum séu alltaf að láta slá hjá sér vellina?“

Stefán segir að lokum að að málatilbúnaður meirihlutans sé „stækasta virðingarleysi“ við starfsfólk sveitarfélagsins.

„Svona málatilbúnaður er stækasta virðingarleysi við starfsfólk og mikilvægan málaflokk. En úr því að bæjarstjórn Kópavogs er í sparnaðargírnum er ágætt að minna á að kurteisi og mannasiðir eru ókeypis.“