Anna Kristjánsdóttir vélstjóri blæs á sögusagnir að það sé vinstri halli á fréttastofu RÚV og segir að fólk ætti frekar að gleðjast yfir tilvist þess frekar en lasta fyrir litlar sakir.

„Í hvert sinn sem Ríkisútvarpið ber á góma vegna einhverra frétta hvar hægt er að tjá sig um fréttina, kemur ávallt einhver vanstilltur hægrimaður og krefst þess að það verði lagt niður með allskyns furðulegum orðsendingum sem venjulega segir miklu meira um þann sem tjáir sig en um RÚV. Oft eru þetta væringar um vinstrihalla á fréttastofunni,“ skrifar Anna á Facebook.

Hún tekur þó fram að hún hafi ekki alltaf verið sátt með RÚV og þá sérstaklega í samhengi við náttúruhamfarir og nefnir Suðurlandsskjálftann árið 2000 sem dæmi. Hún heldur þó að fréttamenn reyni sitt best við að sigla milli öfganna í stjórnmálum.

„Bogi Ágústsson fréttamaður emerítus og uppáhaldsfréttamaður okkar flestra Íslendinga var að eigin sögn boðinn til að leysa af á fréttastofu sjónvarps vegna þess að hann hafði verið virkur í Vöku, félagi lýðræðissinnaðra stúdenta (hægrisinnaðra stúdenta), en sem betur fer örlaði aldrei á persónulegum skoðunum hans í pólitík alla þessa áratugi sem hann var á fréttastofunni. Þá hafa margir sem hafa verið taldir hægra megin við miðju starfað hjá Ríkisútvarpinu, Hallur Hallsson var fréttamaður á RÚV, Ingvi Hrafn Jónsson, Sigmar Guðmundsson, Einar Þorsteinsson og margir aðrir. Á móti má nefna Sigurð G. Tómasson sem var að eigin sögn bolað í burtu frá RÚV vegna skoðana sinna og ekki má gleyma Birnu vinkonu minni Þórðardóttur sem sótti margsinnis um störf á fréttastofunni, en var ávallt hafnað,“ heldur Anna áfram.

Hægri halli, ekki vinstri

„Að tala um vinstrihalla á fréttastofu RÚV er bull, Það væri nær að tala um hægrihalla, en höfum samt í huga að RÚV er sameign okkar allra og ekki síst núna þegar Morgunblaðið er orðið nánast alfarið í eigu útgerðarinnar og framkvæmdastýra SFS er komin í stjórn Sýnar sem á Visi.is og Bylgjuna auk ex Stöðvar 2.“

Þá nefnir hún Elon Musk og forsetakosningarnar í Bandaríkjunum þar sem auðkýfingurinn dældi peningum í kosningabaráttu Donald Trump. Anna spyr hvort við viljum viðlíka ástand á Íslandi þegar stóru einkareknu fjölmiðlarnir eru komnir í eigu útgerðarinnar.

„Sem betur fer höfum við Ríkisútvarpið og eigum að efla það og treysta þó að vissulega getum við verið óánægð með eitt og annað og ég búin að fá mig fullsadda af „Með allt á hreinu“,“ skrifar hún að lokum um ástandið.