Vertinn á veitingastaðnum Kastrup við Hverfisgötu, Jón Mýrdal, hefur nú gefist upp á að ná samningum við skattinn sem og leigusala; Jón hefur yfirgefið staðinn.

Á dögunum var Kastrup innsiglaður af skattinum og voru gestir þá reknir frá diskunum hálf- eða ókláruðum, en staðnum var lokað 2. maí síðastliðinn.

En nú er komið í ljós að mun dýpra var á vandamálinu og staðurinn er enn lokaður.

Jón Mýrdal tjáði sig um málið á Facebook og sagði þetta:

„Kæru vinir það er því miður ljóst að ég kem ekki lengur til með að hafa aðkomu að Kastrup. Það náðust ekki sammingar við skattinn né leigusala.“

Bætti þessu við:

„Þó seinustu vikur hafi verið erfiðar þá er ég stoltur af því sem var rekið í tjaldi á Klapparstíg fyrir fjórum árum ásamt Stebba Melsted og breyttist svo í frábæran veitingastað á Hverfisgötu. Mig langar að þakka ykkur öllum og sérstaklega þeim fastakúnnum sem komu oft í viku. Nú þarf að ganga frá lausum endum og hugsa um framtíðina. Ég veit hverju ég er góður í sem er stuð og stemming og næstu verkefni verða tengd því. Í framtíðinni mun bókhald og tölvupóstar vera gert af fagmönnum.“

Ekki er ljóst á þessari stundu hvort Kastrup heyri sögunni til, eða hvort einhverjir aðrir aðilar muni koma að rekstrinum.