„Ég lít bara á það í dag að ég sé leppur. Þetta félag er bara í vasanum á framkvæmdastjórn Sósíalistaflokks Íslands. Við erum þarna tvær skráðar fyrir Vorstjörnunni, við höfum ekki hugmynd um hvað er að gerast þarna og það er enginn sem vill losa okkur undan þessu með formlegum hætti,“ segir Sigrún E. Unnsteinsdóttir, stjórnarmaður í Vorstjörnunni, í ítarlegu viðtali við Heimildina í blaðinu sem kom út fyrr í dag.

Miklar deilur hafa verið innan flokksins um ýmis málefni eins og Mannlíf hefur fjallað um undanfarið.

Viðtalið við Sigrúnu varpar nýju ljósi á deilurnar innan flokksins og félagsins, sem ber nafnið Vonarstjarnan. Félagið var stofnað utan um húsnæði Sósíalistaflokks Íslands í Bolholti en er einnig styrktarsjóður sem hefur það hlutverk að styðja hin verr settu í að byggja upp og reka hagsmunabaráttu sína.

Sigrún er enn prókúruhafi í Vorstjörnunni en illa gengur fyrir hana að losa sig þaðan þar sem þarf að boða til aðalfundar í félaginu. Sigrún fái hins vegar engar upplýsingar um neitt sem fer fram í félaginu og fái ekki símtöl.

„Löglega er ég ábyrg. Ég er ekki að ásaka neinn um neitt. En þetta er náttúrlega klemma sem ég er í. Það var aldrei ætlunin að vera einhver leppur. Þetta félag er bara í vasanum á framkvæmdastjórn Sósíalistaflokks Íslands.“

Sara Stef. Hildardóttir, varaformaður framkvæmdastjórnar Sósíalistaflokksins, neitar í samtali við Heimidina að eitthvað furðulegt sé í gangi.

Framkvæmdastjórn flokksins skipa: Gunnar Smári Egilsson, Hallfríður Þórarinsdóttir, Kári Jónsson, Laufey Líndal Ólafsdóttir, Luciano Dutra, Margrét Pétursdóttir, Oddný Eir Ævarsdóttir, Sara Stef. Hildardóttir og Sæþór Benjamin Randalsson.