Litlu mátti muna þegar strætóbílstjóri stofnaði öðrum ökumönnum í lífshættu á Miklubraut en upptaka náðist af atvikinu.

Á henni má sjá ökumenn keyra bílum sínum úr austurhluta Reykjavíkur í átt að miðbænum og hefst upptakan við gatnamót Miklubrautar og Háaleitisbrautar, rétt fyrir fjögur í gær. Má sjá bíla á þremur akreinum aka áfram þegar grænt ljós birtist en þá, allt í einu, ekur strætó í veg fyrir þá og má gríðarlega litlu muna að illa fari.

Myndbandið var sett inn í Facebook-hópinn Fávitar í umferðinni og er óhætt að segja að fólk sé ekki sátt við strætóbílstjórann.

„Jahérna, þetta er svo eldrautt að það hálfa væri nú andskotans nóg,“ skrifar Sæþór Hrafnsson.

„Gott að allir þarna voru að fylgjast með,“ bætir Kolbrún Sara Ósk Kristinsdóttir við.

Athygli vekur að margar athugasemdir beinast gegn útlendingum og þá flestar með grófum hætti en ekkert liggur fyrir hver ók vagninum.