Sunneva Birgisdóttir opnar sig í nýlegu og ítarlegu viðtali við Vikuna en þar ræðir hún meðal annars um að hafa verið svikin um 12 milljónir af manni sem hún kynntist í gegnum Tinder en hún telur að hún hafi ekki verið fyrsta fórnarlamb mannsins.

„Hann sagði mér frá áhugamáli sínu, sem er „crypto“ eða rafmyntafjárfestingar. Ég kippti mér ekkert mikið upp við það þar sem minn fyrrverandi var líka mikið inni í þessu og ég leyfði honum bara að sinna því. Ég sá það ekki sem rautt flagg, því mér stóð hreinlega á sama. Fólk er með sín áhugamál og það er bara frábært, ég þarf ekki að blanda mér í það og ég hafði engan áhuga á því. En þegar ég fór að opna mig um mín markmið fyrir árið, sem var að kaupa mína fyrstu íbúð, barst rafmyntaáhugi hans til tals. Mig langaði að komast af leigumarkaðnum fyrir mig og strákana mína og hann bauðst til að hjálpa mér með það, með því að safna meiri pening. Ég, á þeim tíma, treysti honum og hugsaði; hann á nú sitt eigið fyrirtæki og vill hafa skatta og fjármál upp á tíu. Ég var hikandi en hann leiddi mig í gegnum þetta og sagði mér að leggja bara smá summu inn á hann og hann myndi hjálpa mér að ávaxta peninginn og fá meiri pening til baka. Ég samþykkti að gera það og græddi smá í byrjun. Það gerði mig spennta og ég man að ég hugsaði með mér „vá, hann er hérna til að hjálpa mér. Við erum að gera þetta saman.“ Traust mitt á honum var mikið.“

Sunneva hélt áfram að fjárfesta með manninum og urðu upphæðirnar stærri og stærri þrátt fyrir að þau hefðu aldrei hist eða talað við hvort annað í gegnum síma. Á endanum náði vinur hennar að sannfæra Sunneva að það væri verið að hafa hana að fífli. Þegar hún reyndi að fá pening sinn til baka hvarf maðurinn sem hún kynntist á Tinder og heimasíðan sem hún notaði til að fjárfesta hvarf einnig.

„Ég kem sterkari út úr þessu og kem inn af meiri krafti. Ég hef lært eftir þetta að slökun og að hægja á sér getur hjálpað mér. Ég þarf ekki að vera allt fyrir alla og ég má setja mig í fyrsta sæti, hlúa að sjálfri mér og leita mér aðstoðar,“ sagði hún svo um framtíðina og heilsuna.