Þegar við ræddum okkar helstu vandamál og lausnir fyrir þingkosningar í nóvember var vitað að allt okkar öryggi ættum við undir manni sem var með ákveðið einræðisplan og eindreginn vilja til að yfirtaka næsta nágrannaland okkar.
„Forsetinn segir að við verðum að fá Grænland ... Við getum ekki bara hunsað langanir forsetans,“ sagði varaforseti Bandaríkjanna, JD Vance, á Grænlandi í gær, þar sem hann kom óvelkominn og stillti sér upp sem verndara landsmanna.
Við þekkjum svona menn. Menn sem skilja ekki nei. Eða öllu heldur, sem vilja ekki skilja nei.
Menn sem grípa það sem þeir vilja. Segjast verða að gera það.
„Við verðum að fá Grænland. Þetta er ekki spurning um hvort við getum verið án þess. Við getum það ekki,“ sagði Bandaríkjaforsetinn um langanir sínar í gær.
Daginn áður sagði hann: „Við verðum að fá það.“
„Við munum passa upp á ykkur“
Þetta eru raunverulegar tilvitnanir í þeirra eigin orð, sem svo margir vilja ekki trúa eða heyra.
Þann 4. mars síðastliðinn stóð Bandaríkjaforseti frammi fyrir hóp fólks og sagði: „Við munum fá það, á einn eða annan hátt." Þau hlógu og klöppuðu. Þessi hópur var bandaríska þingið. Fólkið sem lögum samkvæmt ákveður hvenær lýst er yfir stríði eða ekki. Nema það verði kannski „sérstök hernaðaraðgerð“.
„Ég er með skilaboð til stórfenglegu þjóðarinnar á Grænlandi,“ sagði forsetinn. Varaforsetinn sat við hlið hans og hló að lýsingunni. Því eins og er ljóst bera þeir enga virðingu fyrir öðrum. Þvert á móti hefur mannfyrirlitningin reglulega skinið af þeim. Til dæmis þegar þeir kröfðu leiðtoga stríðshrjáðrar þjóðar um þakklæti, hæddust að honum fyrir klæðaburð og kenndu honum um að hafa orðið fyrir innrás og ekki tekist að semja við árásaraðilann um að hætta.
„Við munum passa upp á ykkur. Við munum gera ykkur rík,“ voru skilaboð Trumps til Grænlendinga.
Alveg sama hvort þið viljið það eða ekki, þið skuluð fara í samband.
Varaforsetinn var spurður í gær hvort beita þyrfti hervaldi gegn gestgjafaþjóðinni. Hann sagðist telja að það yrði „ekki nauðsynlegt“.
Forsetinn hefur sagt að ef aðrir vilja ekki skilja að þeir þurfi, þá muni bara þurfa að „útskýra það“ fyrir þeim. Evrópu, Danmörku og öðrum.
Þetta er svona fólk, sem maður býður ekki inn fyrir dyrnar. En þeir eru í okkar húsi.
Munu þeir ekki örugglega verja okkur?
Við ræddum þetta sama og ekkert þegar við völdum okkur fulltrúa í kosningum í lok nóvember. Í mesta lagi var spurt: Munu þeir nokkuð fara? Munu þeir ekki örugglega passa upp á okkur? Þannig hélt umræðan áfram í marga mánuði, þótt flestum ætti að vera ljóst hvers eðlis var.
Þegar Trump tók við embætti í janúar hafði hann þegar boðað yfirtöku á Grænlandi. Þorgerður Katrín Gunnarsdóttir utanríkisráðherra sagði engu að síður: „Við verðum að rækta sambandið við Bandaríkin.“
Nú þegar Bandaríkjaforseti hefur í tuga skipta boðað að hann ætli að þröngva sér upp á Grænland, erum við ennþá að láta eins og ekkert sé.
Kristrún Frostadóttir forsætisráðherra sagði 18. febrúar að sambandið við Bandaríkin hefði ekki versnað, heldur „breyst“.
„Við erum með varnarsamning við Bandaríkin og þó að það breytist svona innbyrðis vigtir og áherslur þá þýðir það ekki að það sé nauðsynlega neikvætt, það er bara breytt ástand,“ sagði hún.
„Bandaríkin eru okkar bandamaður, verður áfram okkar bandamaður og við þurfum að vera góður bandamaður fyrir Bandaríkin og Evrópu og það er bara lykiláhersla í þessari ríkisstjórn,“ bætti hún við.
Það var eins og hún væri ekki að tala út frá raunveruleikanum, eða við okkur Íslendinga, heldur velja orð sín út frá öðrum áheyranda.
„Við auðvitað erum bara með fullt og gott traust til Bandaríkjamanna og það verður þannig áfram. Við þurfum bara að halda samskiptunum góðum og jákvæðum. Við getum haft okkar skoðanir …
