Lögreglan á höfuðborgarsvæðinu varar við vefveiðum í nafni Skattsins, en embættinu hafa borist tilkynningar vegna þessa.

Hvernig fara netsvikin fram?

1. Viðtakandi fær vefveiðapóst.
2. Í tölvupóstinum er viðtakanda tilkynnt að það liggi fyrir ógreidd krafa sem greiða eigi samdægurs. Í tölvupóstinum er einnig hlekkur á www.island.is/greida. En á bakvið þennan hlekk er vefsíða sem er ekki tengd island.is heldur er hún tengd við greiðslugátt netsvikaranna.
3. Á vefsíðunni er óskað eftir kennitölu, símanúmeri og vali á viðskiptabanka áður en notandinn er fluttur yfir á greiðslusíðu.
4. Þessi svikasíða stelur kennitölu, símanúmeri og kreditkortaupplýsingum þeirra sem fylla út þessar upplýsingar

Ráðleggingar lögreglu

Lögregla hvetur öll til að vera á varðbergi gagnvart slíkum fjársvikum yfir netið og vill minna á að:

• Skoða vel og vandlega slóðina á greiðslusíðum, oft eru vefveiðivefsíður á .app, .top, .xyz lénum, en alls ekki hægt að útiloka að .is lén séu notuð við vefveiðarnar
• Opinber vefur Skattsins er skatturinn.is
• Opinberar stofnanir biðja aldrei um banka- eða kreditkortaupplýsingar í tölvupósti
• Ekki smella á hlekki sem þið fáið í grunsamlegum tölvupóstum
• Ef þú ert í vafa, hafa beint samband við Skattinn í síma 442-1000

Ef þú hefur smellt á hlekk eða orðið fyrir fjársvikum:

• Hafðu strax samband við bankann þinn
• Hafðu samband við lögreglu í síma 444-1000
• Safnaðu öllum upplýsingum um atvikið og sendu á [email protected]