Hermt er að örvænting ríki í höfuðstöðvum Morgunblaðsins í Hádegismóum þar sem viðvarandi taprekstur er sligandi. Sagan segir að stærstu hluthafar Árvakurs með Guðbjörgu Matthíasdóttur auðkonu í fararbroddi hafi fyrirskipað Haraldi Johannessen, ritstjóra og framkvæmdastjóra, og Sigurbirni Magnússyni stjórnarformanni að girða sig í brók og koma rekstrinum í lag.
Undirliggjandi er ekki verði meiri fjáraustur í miðilinn sem er litaður af skrímsladeild Sjálfstæðisflokksins með tilheyrandi fréttaflutningi um „óvinina“. Rekstrarmistök þykja einkenna rekstur Árvakurs sem heldur úti fokdýrum starfskröftum sem sumir hverjir sjást sjaldan í vinnunni en rekur úr starfi þurftarfólk á borð við blaðamennina Víði Sigurðsson og Kolbrúnu Bergþórsdóttur.
Nýverið sást til þeirra Haraldar og Sigurbjörns í húsakynnum skipulagssviðs Reykjavíkurborgar og einhverjir lögðu saman tvo og tvo. Talið er að erindi þeirra hafi verið að kanna möguleika á nýtingu húsa og lands í Hádegismóum í því skyni að rétta af fjárhag sinn. Þetta yrði sama leið og Ríkisútvarpið fór með því að selja undan sér lóðir og húsakost.
Reifað var í DV að sá möguleiki væri opinn að liðsmenn Guðbjargar hættu prentun Morgunblaðsins og lokuðu prentsmiðju Árvakurs sem á sínum tíma kostaði jafnmikið og fullkominn skuttogari. Með þeim niðurskurði og sölu lóða og húss næði Guðbjörg aftur hluta af fjármunum sínum og losnaði jafnframt undan þeim bagga sem Morgunblaðið hefur verið um langt árabil. Auðkonan notaði einmitt þessa aðferð til að losna frá Prentsmiðjunni Odda sem hennar fólk rak með miklum ósköpum. Það er örvænting í Hádegismóum en handan við hornið er ljósið ...
