Björt og vel skipulögð fimm herbergja íbúð við Laugarásveg 47 í Reykjavík er komin á sölu á 99,8 milljónir króna. Um er að ræða 101,9 fermetra eign sem byggð var árið 1959 og hefur að geyma fjölmarga eftirsóknarverða kosti.
Eigendurnir eru leiklistarhjónin Tinna Hrafnsdóttir og Sveinn Geirsson en þau hafa verið að gera góða hluti á undanförnum árum og leikstýrði Tinna meðal annars Sveini í þáttunum Vigdís, sem slógu í gegn fyrir stuttu síðan.
Íbúðin er staðsett á annarri hæð og hefur sérinngang sem eykur bæði næði og þægindi. Hún er sögð sérlega sjarmerandi og björt, auk þess sem hún býður upp á fallegt útsýni yfir dalinn. Góðar svalir snúa til suðvesturs og skapa kjöraðstæður til útivistar á björtum dögum.
Eigninni fylgir sér garður og sér bílastæði, sem telst mikill kostur á þessum vinsæla stað í borginni. Hluti íbúðarinnar er undir súð, sem þýðir að nýtanlegir fermetrar eru fleiri en opinber skráning segir til um.
Staðsetningin telst afar eftirsótt þar sem stutt er í fjölbreytta þjónustu og afþreyingu. Þar má meðal annars nefna skóla, leikskóla, heilsurækt, sundlaug og heilsugæslu. Þá er stutt í útivistarsvæði dalsins auk vinsælla fjölskylduáfangastaða á borð við Fjölskyldu- og húsdýragarðurinn.
