Heimar fasteignafélag skilaði 8,4 milljarða króna hagnaði á árinu 2025 en árið 2024 var hagnaður félagsins 8,2 milljarðar.

Stjórn félagsins leggur til að greiddur verði arður að fjárhæð 790 milljónir króna samkvæmt upplýsingum í ársreikningi félagsins.

Þá er sömuleiðis lagt til að heimild til endurkaupa á eigin hlutum verði framlengd, allt að 10% af hlutafé, í þeim tilgangi að styðja við arðgreiðslustefnu félagsins. Samkvæmt rekstrarniðurstöðu félagsins myndi sú heimild nema um 2 milljörðum króna, líkt og á fyrra ári.

„Við erum ánægð með rekstrarniðurstöðu ársins sem er í efri mörkum uppfærðrar tekju- og EBITDA-spár Heima fyrir árið 2025. Á árinu námu fjárfestingar félagsins 27 milljörðum króna og marka þær skýrt aukinn tekjuvöxt og styrkingu eignasafnsins,“ segir Halldór Benjamín Þorbergsson, forstjóri Heima.

„Arðsemi hluthafa er í forgrunni ákvarðana okkar. Endurkaup eigin bréfa á árinu námu um tveimur milljörðum króna og voru hlutabréf félagsins á meðal tíu veltuhæstu hlutabréfa í kauphöllinni Nasdaq OMX. Nýfjárfestingar Heima eru agaðar og miða að því að styrkja kjarnasvæði félagsins. Við þróum jafnframt áfram nýja tekjustrauma í rekstrinum og þróunarverkefni innan eignasafnsins munu skila áframhaldandi virðissköpun til hluthafa.”