Gríðarleg pressa er nú á stjórn RÚV vegna þeirrar ákvörðunar sem hún þarf að taka á morgun vegna Eurovision. Þarf stjórnin að segja af eða á með þátttöku Íslands í keppninni á næsta ári en nú þegar hafa fjögur Evrópulönd dregið sig úr keppninni vegna þátttöku Ísraels.

Félag tónskálda og textahöfunda hvöttu stjórn RÚV til þess að sniðganga keppnina í gær og Logi Einarsson, menningar-, nýsköpunar- og háskólaráðherra, vill einnig að Ísland dragi sig úr Eurovision. Páll Óskar Hjálmtýsson, Helga Möller og Björk Guðmundsdóttir hafa einnig þrýst á RÚV varðandi málið. Þá hefur verið boðaður samstöðufundur fyrir utan bækistöðvar RÚV í Engihjallanum klukkan 14:30 á morgun, rétt áður en fundur stjórnarinnar hefst. Og nú hafa Kristinn Hrafnsson og Auður Jónsdóttir bæst í hóp þeirra sem vilja að stjórn RÚV taki þá ákvörðun að Ísland taki ekki þátt í Eurovision á meðan Ísrael keppir þar.

Kristinn, sem er ritstjóri Wikileaks, skrifaði færslu í dag þar sem hann segir að ákvörðun stjórnarinnar sé hreint ekki erfið:

„Stjórn RUV mun víst á morgun taka formlega ákvörðun um þátttöku í Eurovision. Ég reikna með að sú stjórn hafi oft þurft að taka erfiðar ákvarðanir en þessi er ekki ein af þeim. Það er útilokað annað en að sniðganga þessa keppni. Spánverjar, Slóvenar, Hollendingar og Írar hafa nú þegar sagt sig frá henni og Pólverjar og fleiri þjóðir ákveða sig síðar í mánuðinum. Við deilum ekki sviði með þjóðarmorðingjum.“

Auður Jónsdóttir, rithöfundur og fjölmiðlakona skrifaði einnig færslu í dag þar sem hún segir að þátttaka í Eurovision yrði hrein og bein gaslýsing í hugum margra hér á landi.

„Ég vona svo innilega að stjórn RÚV útiloki þátttöku Íslendinga í Eurovision. Svo margir finna til vanmáttar gagnvart þessu kerfisbundna þjóðarmorði að þátttaka væri hrein og bein gaslýsing í hugum margra hér á landi. Ef niðurstaðan verður önnur er víst fátt annað í spilunum en að fara í setuverkfall við RÚV með kaffi á brúsa og prjóna – og norpa þar sem áminning. Getur einhver lánað mér kuldagalla?“