Tækifæri til að komast í nálægð við glæpasagnahöfunda

Hug­myndin að hátíð­inni kvikn­aði árið 2013. „Hug­myndin fædd­ist hjá Ragnari, Quentin Bates og Yrsu fyrir fimm árum og fyrsta hátíðin var svo haldin ári síðar, 2014, þar sem Lilja kom einnig að skipu­lagn­ing­unni. Síðan þá hefur hún verið haldin hér á landi annað hvert ár en þess á milli hefur ein­hver annar haldið hana í okkar nafni erlendis.“

Óskar segir hátíð­ina fara stækk­andi ár frá ári en þetta árið halda um 60 glæpa­sagna­höf­undar erindi á henni í formi pall­borðsum­ræðna og hátt í 150 íslenskir sem og erlendir gestir munu heim­sækja hátíð­ina. „Í ár eru mörg stór og þekkt nöfn sem taka þátt, það hefur nefni­lega verið eft­ir­sótt að kom­ast að á hátíð­ina og við stóðum fljót­lega frammi fyrir því lúx­us­vanda­máli að þurfa að setja rit­höf­unda á biðlista því hátíðin hefur spurst út víða og orðið eft­ir­sótt. Enda hefur hún alltaf heppn­ast gríð­ar­lega vel og við lagt mjög mik­inn metnað í alla umgjörð og dag­skrá.“

Beðinn um að nefna dæmi um nokkra spenn­andi við­burði á hátíð­inni segir Óskar: „Þegar stórt er spurt. Dag­skráin sjálf er auð­vitað hrika­lega spenn­andi og þá eru heið­urs­gest­irnir okkar til dæmis ekki af verri end­anum, þar má nefna for­seta­frúna okkar, Elísu Reid, for­sæt­is­ráð­herr­ann okkar, Katrínu og stór­skáldið Sjón. Þau taka þátt í pall­borði með okkur en einnig má nefna kanadíska höf­und­inn Shari Lapena og Mark Bill­ing­ham, þau halda hvort sitt erindið í dag.“

Spennandi stökkpallur

Óskar kom fram á sjón­ar­sviðið árið 2015 með glæpa­sög­una Hilma. Hann segir Iceland Noir hafa reynst sér vel eftir útgáfu hans fyrstu bókar. „Þetta er frá­bær vett­vangur fyrir nýja íslenska höf­unda og ég fékk að kynn­ast því árið 2016. Hátíðin getur verið spenn­andi stökk­pallur fyrir nýja höf­unda og ekki síst til að kynn­ast þessu sam­fé­lagi rit­höf­unda. Við erum með pall­borðsum­ræður sér­stak­lega fyrir nýja glæpa­sagna­höf­unda,“ segir Óskar sem mælir ein­dregið með hátíð­inni fyrir þá sem eru að stíga sín fyrstu skref sem rit­höf­undar.

Óskar mælir einnig með hátíð­inni fyrir alla þá sem hafa áhuga á glæpa­sögum. „Það er hreint út sagt frá­bært að kynn­ast öllu þessu fólki og fá inn­sýn inn í heim rit­höf­unda, líf þeirra og hvernig þeir vinna. Á hátíð­inni gefst öllum tæki­færi til að kom­ast í nálægð við höf­unda og spjalla við þá. Það hefur verið á bratt­ann að sækja að fá Íslend­inga til að mæta á hátíð­ina en við erum þó með sér­stakt átak í þeim efnum núna þar sem þeir geta keypt sig inn á staka við­burði á TIX.is. Aðspurður hverju það sæti segir Óskar að það sé senni­lega vegna þess að land­inn þekkir þetta ekki. „Ég held að fólk átti sig ekki á því að þetta er fyrir alla og allir vel­komnir. Þarna er bara líf og fjör í tusk­unum.“

Hljómsveit skipuð rithöfundum

Óskar segir að um helj­ar­innar pró­gramm sé að ræða. „Hátíðin byrj­aði síð­degis í gær og svo eru haldnir við­burðir frá morgni til kvölds þar til á sunnu­dag. Svo er auð­vitað ball á morgun, laug­ar­dag, í IÐNÓ. Þar spilar hljóm­sveitin Fun Lovin’ Crime Writers fyrir dansi en sú hljóm­sveit er skipuð sex breskum glæpa­sagna­höf­undum. Þau syngja ein­göngu lög þar sem ein­hver er myrtur,“ segir Óskar og hlær. „Þetta er ekki bara gríð­ar­lega áhuga­verð hljóm­sveit, heldur einnig mjög góð.“

Áhuga­samir geta nálg­ast upp­lýs­ingar um hátíð­ina á vef­síð­unni www.icelandnoir.is.