Dregið var í Sorteo Extraordinario de Navidad í fyrsta sinn 18. desember 1812, þegar stóri vinningurinn fór á miða númer 03604. Í dag er jólaúrdrátturinn í spænska lottóinu einfaldlega kallaður El Gordo, sá stóri, en hann er fastur þáttur í aðdraganda jóla og beðið með mikilli eftirvæntingu ár hvert.
Lottóið er hannað þannig að sem flestir fái einhvern vinning, eða komi a.m.k. út á núlli. Gefin eru út 170 sett af 100.000 miðum en „heill miði“ kostar 200 evrur. Í mörgum tilvikum velur fólk að kaupa saman miða en hverjum heilum miða má skipta í 10 „smærri“ miða, þannig að hver og einn greiði 20 evrur. Stærsti vinningurinn telur fjórar milljónir evra, sem jafngildir 400 þúsund evrum á mann ef miðanum er skipt á milli 10. Vinningarnir eru um 15.300 talsins og heildarvinningsupphæðin 2,4 milljarðar evra.
Úrdrátturinn er sýndur í beinni útsendingu og tekur um þrjár klukkustundir. Vinningsnúmerin eru dregin úr gríðarstórum „kristalskúlum“ og sungin upphátt af grunnskólabörnum. Vegna þess hversu flóknar reglurnar eru og vegna þess að hægt er að kaupa fleiri en einn miða með sama númerinu, er ómögulegt að segja til um hversu margir hafa unnið. Sölustaðirnir fá þó fljótt að vita ef þeir seldu vinningsmiða og þá er hefð fyrir því að skála í Cava.
Athugasemdir