Ingvar E. Sigurðsson var að vinna sín þriðju leikaraverðlaun fyrir hlutverk sitt í myndinni Hvítur, hvítur dagur. Í þetta sinn hlaut hann leikaraverðlaun á elstu kvikmyndahátíð Kanada, FNC kvikmyndahátíðinni í Montreal. Fyrir hafði hann unnið Rising Star verðlaunin í Cannes, Frakklandi og Best Performance verðlaunin í Transilvaniu, Rúmeníu.
Mótleikkona Ingvars, Ída Mekkín Hlynsdóttir, hlaut einnig nýverið leikaraverðlaun fyrir hlutverk sitt á Hamptons hátíðinni í Bandaríkjunum. Hvítur, hvítur dagur hefur í heildina hlotið sjö verðlaun síðan hún var frumsýnd á Critics’ Week í Cannes og vann þar önnur af tvennum aðalverðlaunum dómnefndar. Aukalega við leikaraverðlaun myndarinnar hefur hún einnig unnið aðalverðlaunin á Hamptons í Bandaríkjunum, aðalverðlaunin á Motovun í Króatíu og sérstaka viðurkenningu dómnefndar á Zurich í Sviss. Myndin hefur enn fremur verið valin inn á fjölda annarra virtra hátíða, til að mynda Toronto, Busan, BFI og Karlovy Vary.
Myndin er í forvali fyrir Evrópsku kvikmyndaverðlaunin 2019, er framlag Íslands til Kvikmyndaverðlauna Norðurlandaráðs 2019 og Óskarverðlaunanna 2020.
Myndin Hvítur, hvítur dagur segir frá Ingimundi lögreglustjóra sem hefur verið í starfsleyfi frá því að eiginkona hans lést óvænt af slysförum. Í sorginni einbeitir hann sér að því að byggja hús fyrir dóttur sína og afastelpu, þar til athygli hans beinist að manni sem hann grunar að hafi átt í ástarsambandi við konu sína. Fljótlega breytist grunur Ingimundar í þráhyggju og leiðir hann til róttækra gjörða sem óhjákvæmilega bitnar einnig á þeim sem standa honum næst.
Athugasemdir