„Njála er sú bók sem ég hef lesið oftast“

Ásmundur Helgason, bóka­út­gef­andi og eig­andi Drápu, les sér til ánægju bæði í vinnu og frí­tíma. Hann les jöfnum höndum skáld­sögur og fræði­bækur, sér­stak­lega um veiði, enda mik­ill áhuga­maður um þær. En hvaða bækur skyldu hafa haft mest áhrif á Ásmund?

Jón Miðskipsmaður

„Jón Mið­skips­maður eftir Frederick Marryat er bók sem ég las margoft sem barn og ung­lingur. Bókin kom fyrst út 1836 og sló strax í gegn á Englandi. Ein­hverra hluta vegna var hún til á mínu heim­ili og á sjón­varps­lausum kvöldum var gott að fara suður í Mið­jarð­ar­haf með Jóni og lesa um skyr­bjúg, slags­mál og sjóorr­ustur.“

Íslandsklukkan

„Íslands­klukk­una eftir Halldór Laxness las ég í mennta­skóla og varð alveg stand­andi hissa. Bæði yfir því hve ótrú­lega skemmti­leg hún er (hélt að Nóbelskáld hlyti að vera alvar­legur) og yfir því að það mætti bara fara eftir eigin dyntum í mál­fræði og rétt­ritun.“

Veldu flugu

„Veldu flugu, eftir Pétur Stein­gríms­son í Lax­ár­nesi í Aðaldal, er ein besta bók um flugu­veiðar og sér­stak­lega flugu­hnýt­ingar sem hefur komið út. Þau eru ófá kvöldin sem ég hef eytt með Pétri og flug­unum hans. Þessi er sú lang­lífasta á nátt­borð­inu hjá mér.“

Aðventa

„Aðventu eftir Gunnar Gunn­ars­son las ég fyrir örfáum árum þegar Bjartur gaf hana út. Þessi stutta bók er alger­lega kynn­gi­mögnuð og enn verður mér hugsað til Fjalla-Bensa þar sem hann sat graf­inn í fönn með smala­hund­inum og for­ystu­sauðnum. Þetta er eitt­hvað svo íslenskt. Kjarninn er þarna.“

Njála

„Njála er svo sú bók sem ég hef lesið oft­ast. Enda besta skáld­saga byggð á raun­veru­legum atburðum sem skrifuð hefur verið.“

„Ef ég má nefna nokkrar í við­bót þá voru bæk­urnar um Prins Valíant í gríð­ar­legu upp­á­haldi. Áfram Hæð­ar­gerði og fram­halds­bæk­urnar í þeim flokki voru stór­kost­lega góðar finnskar fót­bolta­bækur og bæk­urnar um Alex hug­djarfa tóku öðrum mynda­sögu­bókum fram. Að lokum langar mig að nefna bækur Einars Kára­sonar um Djöfla­eyj­una og Sturl­unga­öld­ina. Frábærar bækur.“