„Það er sannarlega göfugt markmið að fækka feitabollum þessa heims en tilgangurinn má ekki helga meðalið, ekki í þessu fremur en almennum lyfjarannsóknum. Að auka álögur á fólk vegna neyslu löglegrar vöru er ekki réttlætanleg til að ná þessu markmiði.“
Stefán Einar Stefánsson blaðamaður um sykurskattinn.
„Fasismi sem stjórnmálaskoðun í upphafi síðustu aldar einkenndist ákaflega mikið af áherslu á lýðheilsu og hreysti.“
Guðmundur Steingrímsson er heldur ekki hrifinn og segir sykurskattinn minna á fasisma.
„Það er kannski ágætt fyrir menn að hafa þessar staðreyndir í huga þegar þeir svo velta fyrir sér viðbrögðum Þórhildar Sunnu, að það var hennar eigin ósk að siðanefndin fjallaði um málið. Hún komst að þessari niðurstöðu og hún stendur.“
Steingrímur J. Sigfússon, forseti Alþingis, furðar sig á viðbrögðum Þórhildar Sunnu Ævarsdóttur þingmanns við afstöðu forsætisnefndar, eftir að hún staðfesti niðurstöðu siðanefndar.
„Katrín er með sanni ekki neitt gluggaskraut, hún er valdapólitíkus af gamla skólanum sem lítur á völd sem æðsta tilgang stjórnmálamannsins.“
Birgitta Jónsdóttir, fyrrverandi þingmaður, er ekki beint sátt við störf Katrínar Jakobsdóttur forsætisráðherra.
„Þær [kvikmyndahátíðir, innsk, blm.] senda útsendara víða um heim, þar sem þeir prumpa kolefni. Þær bjóða erlendum gestum, sem prumpa kolefni. Þeir borða kjöt, ferðast með leigubílum, hækka í loftkælingunni. Eru kvikmyndahátíðir hluti af vandamálinu? Já. Geta þær haldið áfram eins og látið sem ekkert sé? Nei.“
Benedikt Erlingssson leikstjóri gagnrýnir kvikmyndahátíðir fyrir kolefnismengun. Á kvikmyndahátíð. Í Tékklandi. Sem hann þáði boð á.
„Djöfull er það aumt að hlusta á þetta aðkeypta hyski þarna í Vesturbænum, reyna að snobba sig upp um stærð á primaloftúlpum með að púa á Arnar Svein.“
Helgi Seljan Jóhannsson, fjölmiðlamaður blöskraði framganga fylgismanna KR í leik KR og Breiðabliks í Pepsi Max-deild karla. Baul áhangenda KR á Arnar Sveinn Geirsson, leikmann Blika, fór fyrir brjóstið á Helga.
„Þessi þróun er til skammar.“
Guðni Ágústsson, fyrrverandi ráðherra, finnst landsmenn ekki huga nógu vel að íslenskunni.
Athugasemdir