Covid-19 hættulegra körlum en konum

Dán­ar­tíðni karl­manna sem sýkj­ast af kór­óna­veirunni Covid-19 er tölu­vert hærri en dán­ar­tíðni kvenna. Í grein­ingu sem Sótt­varna­mið­stöð Kína birti fyrir helg­ina kemur fram að þótt jafnt hlut­fall karla og kvenna sýk­ist af veirunni er dán­ar­tíðni karl­anna 2.8 pró­sent en dán­ar­tíðni kvenna 1.7 pró­sent. Þetta er í sam­ræmi við dán­ar­tíðni í öðrum kór­óna­veiru­sýk­ingum, til dæmis sýkt­ust fleiri konur en karlar af Sar­sveirunni í Hong Kong árið 2003 en rúm­lega helm­ingi fleiri karlar en konur dóu af völdum sjúk­dóms­ins og sama mynstur er rekj­an­legt í öllum slíkum far­öldrum allt aftur til Spænsku veik­innar 1918.

Á vef­síðu breska dag­blaðs­ins Independent er haft eftir vís­inda­mönnum við breskar rann­sókn­ar­stofn­anir að rekja megi ástæður þess að karl­menn séu lík­legri til að deyja af völdum sjúk­dóms­ins til margra þátta, bæði líf­fræði­legra og lífs­stílstengdra.

Sabra Klein, sem stundar far­alds­fræða­rann­sóknir við Johns Hopkins Bloomberg School of Public Health, með áherslu á mis­mun­andi áhrif veira og smit­sjúk­dóma á kynin, segir að það sé greini­legt að ónæm­is­kerfi kvenna eigi auð­veld­ara með að sigr­ast á veirum en ónæm­is­kerfi karla.

„Hvað það varðar að yfir­vinna veiru­sýk­ingar eru karl­menn veik­ara kynið,“ segir hún. Ástæður þess að konur hafa yfir­burði þegar kemur að því að yfir­vinna sýk­ingar af völdum veira liggja ekki fyrir, enda eru rann­sóknir á því til­tölu­lega nýhafnar að sögn Klein.