Tvennum tónleikum Madonnu í París aflýst

Popp­drottn­ingin Madonna hefur neyðst til að aflýsa tvennum af Madame X tón­leikum sínum í París vegna banns yfir­valda við sam­komum með fleiri en þús­und þátt­tak­endum. Tón­leik­arnir, sem vera áttu í kvöld og annað kvöld, 10. og 11. mars, áttu að vera lokatón­leikar Madame X tón­leika­ferðar drottn­ing­ar­innar.

Madame X tón­leika­ferðin hefur reyndar engan veg­inn gengið nógu vel síðan hún hófst á síð­asta ári og Madonna hefur áður neyðst til að aflýsa þó nokkrum tón­leikum vegna meiðsla.

Skipu­leggj­endur tón­leik­anna, Live Nation, segja í til­kynn­ingu sem birt­ist á heima­síðu Madonnu að þeim þyki miður að þurfa að valda aðdá­endum söng­kon­unnar von­brigðum með því að fella tón­leik­ana niður en það sé gert til að fram­fylgja til­skip­unum yfir­valda í Frakk­landi. Miðarnir verði að sjálf­sögðu end­ur­greiddir.

Madonna sjálf hefur ekki tjáð sig um málið en hún er ekki eini tón­list­ar­mað­ur­inn sem hefur þurft að aflýsa tón­leikum vegna aðgerða gegn útbreiðslu kór­óna­veirunnar, til dæmis hefur Stormzy aflýst fyr­ir­hug­aðri Asíuferð með túr­inn Heavy Is The Head og tón­list­ar­há­tíð­inni SXSW í Austin í Texas, sem halda átti í apríl, hefur verið aflýst. Margir krefj­ast þess að risa­stórum tón­list­ar­há­tíðum eins og Coachella og Gla­ston­bury verði sömu­leiðis aflýst og fregnir herma að skipu­leggj­endur hátíð­anna séu að velta því fyrir sér.