Neyðarlög sett í Bretlandi – lögreglunni heimilt að beita valdi til að reka fólk inn

Ný neyð­ar­lög bresku rík­is­stjórn­ar­innar vegna kór­óna­veiru­far­ald­urs­ins voru kynnt í Bret­landi í dag. Samkvæmt þeim er lög­regl­unni falið að sjá til þess að fólk virði útgöngu­bannið sem sett var á mánu­dag og gefa lögin lög­reglu­mönnum heim­ild til að beita valdi „innan hóf­legra marka“ til að sjá til þess að þeir sem brjóta gegn útgöngu­bann­inu snúi aftur til síns heima.

Rík­is­stjórnin segir lögin eiga að tryggja það að for­eldrar sjái til þess að börn þeirra virði útgöngu­bannið en sé það ekki virt er lög­regl­unni heim­ilt að sekta þá sem úti eru um 30 pund og sektin hækkar upp í 60 pund sé hún ekki greidd innan 14 daga.

Þeir sem góm­aðir eru við að hunsa útgöngu­bannið í annað sinn verða sektaðir um 120 pund og eiga það á hættu að vera lög­sóttir.

Í lög­unum er lög­regl­unni, eins og áður sagði, einnig gefin heim­ild til að beita valdi til að fá villu­ráf­andi útgöngu­banns­brjóta til að hlýða fyr­ir­mælum, en hversu mikið vald liggur innan „hóf­legra marka“ er ekki til­greint. Í kynn­ingu inn­an­rík­is­ráðu­neyt­is­ins á nýju lög­unum kom fram að sá sem bryti gegn útgöngu­bann­inu væri að brjóta lög og því væri lög­regl­unni heim­ilt að hand­taka við­kom­andi ef hann hlýddi ekki vin­sam­legum til­mælum um að koma sér í hús.